Израелскиот премиер Бенјамин Нетанјаху изјави пред Кнесетот дека Израел е обединет во својата кауза, признавајќи дека ќе има истрага за разузнавачките и безбедносните неуспеси што му дозволија на Хамас да изврши таков разорен напад на 7 октомври. Тој го повика светот да се обедини и да се бори против Хамас. Повеќе од 1.300 Израелци беа убиени во ненадејниот напад, а Хамас зеде најмалку 199 заложници во Газа, кои сè уште ги држи, објавија западните медиуми.
„Има многу прашања околу катастрофата што нè снајде пред 10 дена. Ние детално ќе го истражиме секој аспект“, рече тој.
„Нацијата е обединета во една цел – победа. Ќе триумфираме бидејќи се работи за самото наше постоењена овие простори, кои се преполни со мрачни сили. Хамас е дел од злобната оска на Иран и Хезболах. Нивната цел е да го фрлат Блискиот Исток во бездната на хаосот. Сега многумина ширум светот разбираат со кого се соочува Израел. Тие сфаќаат дека Хамас претставува нова верзија на нацизмот. Како што светот се обедини за да ги победи нацистите и ИСИС, така мора да се обедини и да го победи Хамас. Посветени сме на сите семејства. Нема да попуштиме во нашите напори да ги вратиме нашите браќа и сестри“, истакна Нетанјаху во својот говор.
Израелскиот претседател Исак Херцог, исто така, изјави пред пратениците дека војната против палестинската милитантна група Хамас е конфликт меѓу „апсолутно добро“ и „апсолутно зло“.
„Сите зборуваат за сложеност, но ова не е комплексен момент. Тука има апсолутно добро, има апсолутно зло. Тука има светлина, а таму темнина“, нагласи Херцог на првата зимска седница на Кнесетот, пренесува „Тајмс оф Израел“.
Тој додаде дека Израел, благодарение на САД и нивната помош, не е сам во оваа војна. „Ние се бориме како дел од семејството на народите, сите оние кои бараат правда, мир и слобода, против непријателот кој докажа дека човештвото и хуманизмот се негови непријатели“, рече Херцог. Тој нагласи дека израелското општество се обединило во изминатите 10 дена, откако палестинската милитантна група Хамас изврши напади врз Израел.
„Бруталниот напад на нашите непријатели беше насочен кон еврејскиот народ. Речиси нема дом во Израел каде што не стигна бранот на болната трагедија што ја доживеавме“, рече шефот на израелската држава.
Според него, „длабочината на заедничката тага докажува дека сите граѓани на Израел се една израелска нација. Имаме прекрасна нација, нација која знае дека нема друг избор и нема друга земја”, заклучи Херцог.
Г. Т.
