Градоначалникот на Куманово Максим Димитриевски, кој од неодамна стапи на функцијата претседател на партијата ЗНАМ на последната Седница на Советот на Град Куманово со реплика ѝ се обрати на советничката од редовите на ДУИ Арта Адеми дека, како во минатото, така и во иднина е подготвен да биде ставен во функција на кампањите на нејзината партија. Истакнувајќи дека не практикува да се фали со своите дела, Димитриевски потенцираше дека единствените два пати кога го сторил тоа било кога учествувал на манифестации организирани од функционери на ДУИ.
„Во цела кариера од 6 години, јас имам пресечено две ленти и двете се со членови на влада од ДУИ. Едната лента ја пресековме кога се отвораше салата во економско училиште на албански наставен јазик, осум министри се наредија, едниот прст ќе ми го исечеа по грешка пошто се згураа на врата. Вториот проект, пак ја пуштаа истата спортска сала и третиот пат, кога ќе одиме таму, пак ќе ја пуштаат“, посочи Димитриевски.
Реалноста е сосема поинаква. На фотографиите од настаните, јасно се гледа дека исклучително му годело присуството во друштво на владините функционери, кои всушност промовирале завршени објекти од проектот на Министерството за образование за изградба на 145 спортски сали.
Димитриевски преку оваа изјава подметнува невистина, бидејќи станува збор за две различни спортски сали, едната во Средното училиште Перо Наков, а другата во Основното училиште Јероним Де Рада во с. Черкези, Куманово.
Овој обид на градоначалникот на Куманово да создава погрешен впечаток во јавноста може само да им наштети на граѓаните на Град Куманово. Останува прашање дали овој систем на функционирање на Димитриевски ќе се пренесе и во новата партија ЗНАМ.
М. П.