Министерот за надворешни работи Бујар Омани денеска осврнувајќи се на вчерашната изјава на виокиот претставник за надворешна и безбедносна политика на ЕУ Жозеп Борел дека ЕУ сака да го вклучи Западен Балкан во својот процес на одлучување, како за надворешната така и за безбедносната политика, пред влезот на регионот во Унијата, рече дека Северна Македонија е сто отсто усогласена со надворешната безбедносна политика на ЕУ, а при тоа тој како шеф на дипломатијата не е дел од Советот за надворешни работи на Унијата.
-Мене ми е жал што нашата иницијатива за повеќе интеграција пред членството некако не доби и во нашата јавност премногу гласност, бидејќи тоа беше наша идентична идеја која што ја промовираме во ЕУ. Јас постојано во секој мој говор зборувам ако Северна Македонија е сто отсто усогласена со надворешната безбедносна политика, зошто јас не сум дел од Советот за надворешни работи на ЕУ. Не мора да имам право на глас се уште додека не сме членка, меѓутоа треба да бидам на маса, како што треба да бидеме на маса секаде каде што сме усогласени со реформите и со стандардите на ЕУ, да имаме пристап до заедничкиот пазар, да имаме пристап до парите, рече Османи.
Министерот посочи дека како земја-кандидат во моментот добиваме 160 евра по глава на жител пари од ЕУ, додека Бугарија како соседна европска земја-членка добива 4.700 евра по глава на жител.
Доколку продолжиме вака наместо да создадеме една социјална конвергенција ние повеќе се оддалечуваме. Затоа јас ја промовирав идејата пред да станеме членка да имаме пристап до тие средства, да имаме пристап до пазарот, да седнеме на маса за потоа кога ќе станеме членка тоа да не биде голема вест, затоа што земјата ќе биде доволно развиена и ќе сето тоа ќе биде нормално. И мислам дека ЕУ тоа го прифати. Го прифати Австрија преку својот нон пејпер, Германија и Франција на еден поинаков начин, меѓутоа во тој контекст и ЕУ со планот за раст којшто го претстави Фон дер Лајен и вчера и изјавата на Борел. Значи, мислам дека треба да се гордееме што сепак една наша автентична идеја станува мејнстрим идеја на ЕУ, рече Османи.
Борел вчера за време на претседавањето со состанокот на министрите за надворешни или европски работи на членките на ЕУ и шесторката од Западен Балкан, Борел на социјалната мрежа Х напиша и дека „местото на Западен Балкан е во ЕУ“.
-Вечерва претседавам со министерскиот состанок ЕУ-Западен Балкан, со шест министри од тој регион. Сакаме да го интегрираме регионот во нашиот процес на донесување одлуки уште пред пристапувањето, вклучувајќи ги и одлуките за надворешната и безбедносната политика. Местото на Западен Балкан е во ЕУ, нагласи Борел.
-Теми на Советот за надворешни работи беше ситуацијата во Украина, ситуацијата во Блискиот Исток, ситуацијата во Јужен Кавказ, каде што се разговараше перспективата на ЕУ и тука беа вклучени и земјите кандидати, односно земјите од Западен Балкан во рамки на оваа идеја ние да сме дел од процесот уште пред самото членство. Ние сме во комотна позиција на таквите средби бидејќи имаме стопроцентна усогласеност на надворешна политика и секогаш сме земени како пример од сите земји членки како една земја може да се покаже дека е партнер на којшто може да се потпре ЕУ уште пред да стане членка, истакна денеска Османи.
Шефот на дипломатијата не присустуваше на состанокот во Брисел, поради, како што појасни вчера, важните состаноци во рамки на претседавањето на Северна Македонија со ОБСЕ, што се одржуваат во Скопје вчера и денеска, а на кои присуствуваат амбасадори на членките на ОБСЕ и генералната секретарка на Организација Хелга Шмид. На состанокот во Брисел, како што информира Османи од МНР присуствувала заменик-министерката за надворешни работи Фатмире Исаку.
