Припадници на Вооружените сили (ВС) на САД за Европа и Африка, од денеска до 10 декември ќе изведуваат вежбовни активности на армискиот полигон „Криволак“ во рамки на вежбата „Храбар партнер 23“.
Припадниците од вториот коњанички полк на ВС на САД, на полигоните и стрелиштата на „Криволак“ ќе реализираат вежбовни активности со гаѓања од лесни оклопни возила од типот „Страјкер“.
Армијата на Република Северна Македонија ќе учествува во вежбовната активност како земја домаќин со 30-тина свои припадници, потребната воено-полициска придружба и обезбедување, како и логистичка поддршка на активностите.
-Со овој вид на вежбовни активности, покрај зацврстување на сојузништвото и интероперабилноста со ВС на САД, се демонстрираат способностите за заедничка одбрана и одвраќање, како и капацитетот и значењето на АП „Криволак“ за изведување на различен вид на обука и вежби. Воедно, ова претставува можност за практично запознавање со карактеристиките и можностите на овој тип на оклопни возила, кои согласно планот за развој на одбранбените способности за модернизација и опремување ќе бидат дел од нашата Армија во следниот период, велат од Министерството за одбрана.
