„Премиерот и претседател на СДСМ, Ковачевски даде изјава дека ќе се испочитува договорот од изборите од 2020 година, последните 100 дена од техничката влада да припаднат на премиер од етничка албанска заедница. ДУИ, нашиот коалиционен партнер излезе со предлог тоа да биде Талат Џафери. Вчера се виде во потесното раководство и во ИО тој предлог, но централниот одбор ќе треба тоа да го процесуира соодветно односно да се формализира следниот состав на владата. Вчера се донесе одлука претседателот да продолжи со преговори за составот на техничка влада во која сите опции се отворени, ние сме познати како партија по концептот „Едно општество за сите“, изјави потпретседателот на СДСМ Фатмир Битиќи на „24 Анализа“ на Телевизија 24.
Тој додаде дека прифаќањето на различностите е една од вредностите на тој концепт, не само етничката различност туку и сите различности коишто ги носат луѓето коишто живеат во нашата држава и затоа одлуката дека може да има премиер Албанец е составен дел од концептот „Едно општество за сите“.
„Јас секако сум еден од поборниците на тој концепт и човек којшто длабоко верува во истиот, велам дека се е возможно. Во духот на размена на позициите би било интересно да се разговара за тоа дали треба позиција на прв вицеприемер како предлог на ИО“, заклучи Битиќи.
