„На 24 февруари, се чувствував како да не можам да дишам. Како моето најдрагоцено нешто да беше оттргнато од мене… Ништо и никој не може да ми ја одземе величенственоста на слободата и вистината на мојата земја”.
Ова се зборови на италијанско-украинската визуелна уметница Софија Чотирбок (1991) чија изложба „Дома пред темница” беше отворена синоќа во Националнa галерија „Мала Станица” Скопје.
Поставката произлегува од биографска епизода на уметницата поврзана со барањето за италијанско државјанство што би значело откажување од нејзиното родно државјанство, украинското. Нејзиното истражување, генерално се фокусира на темата на идентитетот во постсоветското општество и архивата како интимна и домашна меморија, преобразена во универзална човечка материја преку фотографија, видео и ткаенина.
Изложбата е отворена по повод 2-годишнината од руската инвазија врз Украина и ќе остане поставена за јавноста до 1 март 2024 година.
