Денеска, фондацијата „Принцеза на Астуријас“ (Princesa de Asturias) информираше дека жири комисијата одговорна за избор на наградените за 2024 во категоријата за научно и техничко истражување, донела одлука за доделување на оваа годишна престижна награда на 5 научници, меѓу кои и на Светлана Мојсов, македонска хемичарка која живее и работи во САД, известува македонскиот амбасадор во Шпанија, Едмонд Адеми.
Тој во објавата на социјалните мрежи нагласува дека „во образложението на жирито е наведено дека истражувањата што ги спровеле научниците имале значаен клинички и социјален импакт, дека го подобруваат квалитетот на живот за стотици милиони луѓе ширум светот, а како резултат на нивниот придонес во развивањето ефективни лекарства за справување со дијабетес и дебелината, како и за ублажување на асоцијативни форми на патологии, како кардиоваскуларни болести“.
„Се работи за најпрестижните награди што од 1981 па навака ги доделува наследникот на шпанскиот трон (сега тоа е Принцезата Леонор, која до преземањето на шпанскиот трон ја носи титулата Принцеза на Астуријас) и кои се наменети за препознавање на научна, техничка, културна, литературна, спортска, социјална и општествена дејност реализирана од индивидуи, институции, група луѓе или институции во меѓународни рамки“, потенцира Адеми.
Церемонијата за свечено доделување на наградите ќе се одржи на 25 октомври 2024 во градот Овиедо.
