Никогаш немало потешко, но и поважно време за борба за Европа, изјави синоќа германскиот претседател Франк-Валтер Штајнмаер.
Во говорот пред студентите на Европскиот колеџ, елитна институција која ја обучува идната генерација службеници во институциите на ЕУ во белгискиот град Бриж, тој истакна дека следната генерација претставници на ЕУ мора да ги бранат слободата и демократијата, идеалите на Унијата, објави веб-страницата на германското претседателство.
„Сигурен сум дека сите ќе го најдете своето место да работите за чудото на Европа, да работите за нејзината иднина. Затоа, без разлика каде ќе завршите – во вашите матични земји или институциите на Европската унија, во дипломатијата или во третиот сектор – ви аплаудирам што избравте да работите за јавното добро. За доброто на Европа. Ви аплаудирам и имам најдлабока почит што го избравте овој пат, бидејќи сите знаеме: Времињата во кои влегувате во јавна служба се историски тешки времиња. Војната на Русија против Украина, бруталниот напад на Хамас врз Израел и страдањето на мажите, жените и децата во Газа. Заканите против нашите сопствени демократии, и надворешни и внатрешни. Борбата против климатските промени и големото влијание на енергијата, дигиталната и економската трансформација низ нашите општества. Да, навистина е тешко време да се влезе во јавна служба“, нагласи Штајнмаер.
Нагласувајќи ги актуелните случувања во светот, германскиот претседател додаде дека на многу луѓе, особено на младите, кои го гледаат сето ова, им се чини дека реалноста и идеалот, и нашите амбиции за светот, се повеќе и повеќе се распаѓаат.
„На 24 февруари 2022, Владимир Путин не само што ја нападна Украина – тој ја сруши целата безбедносна архитектура на нашиот континент. Тој ја уништи идејата за поредок заснован на заеднички правила и мирен соживот, поредок за кој толку напорно работевме да го изградиме. Така, денес, наместо да шириме мир и просперитет, се наоѓаме себеси како повторно се вооружуваме, испраќаме оружје во Украина во нејзина одбрана од агресорот и ја зајакнуваме нашата сопствена одбрана на сите нивоа: војската, во енергетиката и трговијата, во нашите демократски институции“, оцени Штајнмаер.
Тој потенцира дека „вака функционира Европа. Ова е убавината на Европа: Компромисот гради соработка. Соработката гради единство. Единството гради сила. Кога ја нападна Украина, Путин мислеше дека Западот ќе биде слаб и поделен. Докажавме дека не е во право. Ние во Европа, ние во НАТО бевме посилни и пообединети од кога било – и мораме да продолжиме да ја поддржуваме Украина се додека тоа е потребно!“
На крајот, честитајќи им го дипломирањето на студентите, Штајнмаер им посака да се борат за својата Европа – со храброст, отворен ум и отворено срце.
Г. Т.
