Пишува: ЕМИЛИЈА ЦЕЛАКОСКА
ДПМНЕ, (со украденото име ВМРО), преку своите претставници, јавно прави комедии со коленици, промаи и слични глупости. Тоа е дружината која се напрчи на гласачки ливчиња и си начека коска за глодање. Тоа е нивното „развојно” портфолио, грабливото цивилизациско ниво. Ај што програмата со застарена терминологија им е препис од Грујо (Б. Јовановиќ) и воопшто немаат поим што прават, туку и баш им е гајле дека немаат поим што прават.
Ние се мамиме со нивнава трагедија – комедија: Како некои гладни за прва класа, ете, начекале да се возат во прва класа, на товар на народот, јасно. Но, тоа е само диверзија, димна завеса за да не гледаме како се одвива рушењето во социјалата, образованието, економијата и сѐ по ред и неред.
Мора да следиме на ЕНЕР, на сајтот на Собранието, по интервјуа и средби што „планираат”. Оти нивните „планови” се голи РУШЕЊА на нешто што функционира. На секоја најава по официјалните министерски сајтови за некакви измени веднаш се гледа не само немањето поим што прават, туку немаат поим што тековно постои, што функционира, како се прават анализи, како и каде се наоѓаат податоци за состојбата, како се проценуваат тие, како да се подобри постоечкото. Ако нешто не функционирало, докажи со бројки, со податоци, факти, а не измислици што заличуваат на факти.
Свесни дека следиме, се преправаат дека „работат”, прво со плукање на нешто што функционира, а потоа, од некакви матни „реакции” на насловена маса граѓани, си избиструваат некој тотално заостанат, туп, глуп и надминат правец – крив-лев, небаре новост, небаре генијална идеја што ним им текнала и божем ја напишале во програмата (главно – не, бидејќи е препис).
Таква простотија, неукост, тупавост може да се очекува само од дружина којашто чудо е како воопшто има способност за говор. А и жити говорот – лаги, гадости, неписменост, немам зборови. А тие, секогаш имаат, и тоа најотровните!
Тоа е можеби и проблемот со прогресивните сили: Реално е тешко да се обмисли вистински функционалното, корисното, прогресивното, затоа што е работа на иднината. Нема доволно зборови и цврсти концепти таму, затоа што тие допрва треба да се сфатат, заокружат, во тек на остварувањето. Додека, конзервативните и изгубенковците како ДПМНЕ кои мислат дека се конзервативни, смешни во сериозноста на позата на „центар-десно”, си верглаат стари, прастари, заостанати концепти и убаво застоени зборовни манџи. Старото се фаќа, оти е познато.
Макар што, нивното старо има и спајк протеини, мали шмукли кукички: Зборовите околу кои некогаш се вртеле цврсти концепти, од ДПМНЕ ги посипуваат со својата скрама од мувла и такви ги служат за појадок, ручек и вечера додека и сами не се претворите во мешунки од таа скрама!
ДПМНЕ е национален срам и веќе – национална трагедија…Чарето со ЕНЕР, не е баш не знам какво чаре, ама колку да се држи носот и устата над дпмнеовската септика… Ако не нѐ блокираат и таму.
