Хезболах лансираше стотици ракети и беспилотни летала кон Израел како одмазда за атентатот врз нивниот командант во Бејрут минатиот месец, соопшти движењето поддржано од Иран.
Израелски авиони нападнаа цели во Либан непосредно пред нападот бидејќи војската процени дека Хезболах се подготвува да изврши напад.
„Околу 100 израелски воени авиони погодија илјадници ракетни фрлачи на Хезболах во јужен Либан, насочени кон северен и централен Израел“, соопшти војската.
За време на воздушните напади, кои беа извршени во раните утрински часови денеска, беа уништени над 40 места во Либан, наменети за извршување напади врз територијата на Израел, соопштија Израелските одбранбени сили (ИДФ).
Израел утринава уништи илјадници ракети на Хезболах, изјави израелскиот премиер Бенјамин Нетанјаху и нагласи дека израелската Влада е одлучна да направи се за да ја заштити земјата.
„Утрово ги откривме подготовките на Хезболах за напад на Израел. Во консултација со министерот за одбрана и началникот на Генералштабот на ИДФ, и наредивме на нашата војска да дејствува проактивно за да ги елиминира заканите“, рече Нетанјаху на почетокот на утринскиот вонреден состанок на кабинетот за национална безбедност, откако Хезболах соопшти дека ја провел „прва фаза“ од нападите врз Израел како одговор на убиството на главниот командант на групата.
Според Нетанјаху, оттогаш израелската армија интензивно работи на спречување закани и уништила илјадници ракети кои биле насочени кон северот на Израел, а исто така спречува и многу други закани и дејствува со голема сила во одбраната и нападот, пренесува „Тајмс оф Израел“.
