Во продукција на „Ејч-би-о“ (HBO), снимањето на ТВ-серијата „Хари Потер“ (Harry Potter) ќе почне летото 2025 година, во студиото „Ворнер брос Ливсден“ (Warner Bros Leavesden), во Ватфорд, северозападен Лондон, Англија. Серијата ќе има сосема нова екипа глумци, а приказната ќе остане автентична со книгите на Џ.К. Роулинг, објавија продуцентите.
„Претстојната оригинална серија на ‘Ејч-би-о’, ‘#HarryPotter‘ ќе се снима во студиото ‘Ворнер брос Ливсден’, а продукцијата ќе почне во летото 2025 година и ќе се појави на (стрим-платформата) ‘Maкс’. Серијата ќе има нова екипа која ќе ја води новата генерација обожаватели, полна со фантастични детаљи, многу саканите ликови и драматични места коишто обожавателите на ‘Хари Потер’ ги сакаат повеќе од 25 години,“ соопшти продукциската куќа.
По повикот за кастинг, објавен во септември, 32.000 деца биле на аудиција за главните улоги, при што „тимот прегледува до 1.000 ленти дневно“, според „Ејч-би-о“.
Повикот за кастингот пропишува дека апликантите мора да бидат жители на Обединетото Кралство или Ирска, на возраст меѓу 9 и 11 години.
Инаку, последниве години, писателката Џ.К. Роулинг е обвинувана за трансфобија, за нејзините ставови за новите родови идентитети. Таа си го кажува ставот и како авторитет, според некои западни медиуми, таа сепак ќе биде дел од новиот проект.
Глумците Даниел Редклиф, Ема Вотсон и Руперт Гринт, кои ги глумеа главните ликови во филмовите „Хари Потер“ од предминатото десетлетие, искажаа јавно несогласување со писателката.
