Комплетна мастодонска вилица била откопана во дворот на една куќа во Њујорк, според Државниот музеј на Њујорк, пренесува Си-Ен-Ен.
Вилицата, заедно со парче коска и фрагмент од ребро, беше ископана од тимови од Државниот музеј на Њујорк и Државниот универзитет во Њујорк Оринџ, откако еден сопственик на куќа во округот Оринџ, забележал „два необични заби сокриени во трева“ додека го уредувал дворот.
Според музејот, ова е првпат во последните 11 години вакво откритие да биде забележано во државата Њујорк. Повеќе од 150 фосили од мастодон се пронајдени ширум државата, околу една третина од оние во округот Оринџ, кој музејот го нарекува „жариште“ за наодите.
„Оваа мастодонска вилица дава единствена можност да се проучува екологијата на овој прекрасен вид, што ќе го подобри нашето разбирање за екосистемите од леденото доба од овој регион“, рече Роберт Феранец, директор за истражување и колекции на музејот и куратор на животните од леденото доба.
Мастодоните, далечни роднини на модерните слонови, живееле во Северна Америка од пред околу 3,75 милиони до 11.000 години. Возрасен мастодон бил висок помеѓу 2,5 до 3 метри и тежел дури шест тони.
Научниците веруваат дека комбинацијата на конкуренција за храна, климатските промени и прекумерниот лов од раните луѓе довело до нивно истребување.
Вилицата и придружните фрагменти пронајдени во Њујорк сега ќе бидат подложени на „ригорозна научна анализа, вклучувајќи јаглеродно датирање и реконструкција на исхраната“, се вели во соопштението на музејот, додавајќи дека историскиот наод ќе биде изложен на јавноста во 2025 година.
Подготви: Ј. Ѓ.
