Министерот за здравство Арбен Таравари попладнево изјави дека за неколку директори се прави евалуација околу тоа како ја водат здравствената установа, колку стручно и компетентно.
-Ги евалуираме повеќето директори, ни требаат повеќе индикатори. Не сакаме емоционално да постапиме. Ни требаат сигурни докази таму каде што гледаме дека директорите не раководат баш како што треба, треба да се заменат со подобри. Меѓутоа сега не би сакал веднаш да кажам. Треба да донесеме коректна и фрагматична одлука, одговори тој на новинарско прашање, по актуелните случувања на Детската клиника и на Клиниката за респираторни болести кај децата – „Козле“.
На прашање за случајот со починатото седуммесечно бебе на Детската клиника и извештајот на ДСЗИ, министерот рече дека се очекува и извештај од стручна комисија. Таравари, исто така, повтори дека специјализанти низ клиниките дежураат одамна.
-Имало три специјалисти таа вечер, меѓутоа причекајте очекуваме и извештај од стручна комисија. Секако дека како Министерство веќе за неколку директори правиме евалуација, за тоа како го водат, колку стручно и колку компетентно и според тоа и ќе одговориме. Меѓутоа не ни требаат емоции во именување, во разрешување. Ни требаат податоци да видиме таму каде што има незадоволство, не функционира како што треба, секако ќе се преземат чекори, одговори тој на новинарски прашања за случајот со починатото седуммесечно бебе.
Директорката на Универзитетската клиника за респираторни болести кај децата – „Козле“, Каролина Симоновска вчера беше на средба со министерот по реакциите во јавноста за проблеми на Клиниката. Таа ја опиша средбата како „доста конструктивна“, а на прашањето дали ќе остане директорка, одговори дека се надева дека ќе остане.
Во врска со тоа дека Скопје утре ќе има прекин во водоснабдувањето, Таравари увери дека Клинички центар комплетно ќе биде покриен.
-Веќе обезбедивме донација од вода. Клинички центар комплетно ќе биде покриен. Ќе се обидеме да се редуцираат нормално интервенциите, меѓутоа тоа што е неопходно, веќе комплетно Клиничкиот центар, а се надевам и другите болници во Скопје, тие што ќе бидат опфатени со редукција на вода, ќе бидат покриени и веќе имаме донација, одговори министерот на новинарско прашање.
По најавата од скопски „Водовод“ за прекин во водоснабдувањето од вечер во поголем дел од градот, од ТОАРИЛУЦ и Клиниката за хируршки болести „Свети Наум Охридски“ за МИА информираа дека најитните интервенции утре ќе се реализираат непречено.
Директорката на ТОАРИЛУЦ, Марија Срцева во изјава за МИА рече дека во соработка со Службата за општи и заеднички работи при клиниките, во тек се подготвителни активности за непречено функционирање на клиниката ТОАРИЛУЦ, во однос на состојбата при прекинот на снабдувањето со вода.
