Најмалку 179 лица загинаа откако авион излетал од писта на меѓународниот аеродром Муан во Јужна Кореја и се запали, јави ДПА.
Двајца преживеани, двајцата членови на екипажот, се пренесени во болница откако авионот излетал од пистата при слетувањето и удрил во ограда.
Претходно, националната противпожарна агенција на земјата соопшти дека 84 жени, 82 мажи и 11 други чиј пол не може веднаш да се идентификува, загинале во авионската несреќа.
Во претседателската канцеларија во Сеул беше свикан итен состанок, со кој претседаваше шефот на кабинетот Чунг Џин Сук, на кој се разговараше за координацијата на министерствата за обезбедување ресурси како медицинска помош.
Јужнокорејската телевизија емитуваше видео на кое се гледа како леталото се лизга по пистата без спуштена опрема за слетување, удира на крајот од пистата и се запали.
Авионот Боинг 737-800 што се враќал од Бангкок, а несреќата се случила во 9:03 часот (0003 GMT), објави Министерството за транспорт.
„Авионот е речиси целосно уништен и тешко е да се идентификуваат загинатите“, изјави претставник на противпожарната служба.
На летот на Чеџу Ер (Jeju Air) имало 175 патници и шест членови на екипажот.
Извршниот директор на Jeju Air, Ким Е-Бае, рече дека авиокомпанијата изразила длабоко сочувство.
„Во моментов, допрва треба да се утврди точната причина за несреќата и мора да почекаме официјална истрага од владините агенции“, наведе Ким во соопштението.
„Без оглед на причината, јас ја преземам целосната одговорност како главен извршен директор“.
Властите се сомневаат дека удар на птици довел до несреќата, врз основа на првичните истраги.
Вршителот на должноста претседател Чои Санг Мок го посети местото на несреќата и им нареди на агенциите да ја искористат сета расположлива опрема, персонал и инфраструктура за „да спасат уште еден живот“.
Чои беше вршител на должноста претседател од петокот, откако пратениците гласаа за импичмент на тогашниот вршител на должноста претседател Хан Дак Су, едвај две недели откако Јун Сук Јеол беше отстранет од претседателската функција поради неговото воведување воена состојба.
Јужнокорејското Министерство за одбрана соопшти дека на аеродромот се распоредени околу 180 лица, противпожарни возила и амбулантни возила.
Сите други летови до и од Муан се откажани.
Поврзано:
(ВИДЕО) Двајца потврдени преживеани во авионската несреќа во Јужна Кореја, биле во делот од опашката
