– На првите минусни температури, неспособното ДПМНЕ и реководството на ЕСМ за снабдување со топлинска енергија го оставија половина Скопје без парно. Центар, Ново Лисиче, Аеродром, Кисела Вода, Капиштец, но и други населени места се без греење. Парно греење нема ниту во дел од училиштата и градинките, родителите во повеќе општини добиле повик да дојдат да си ги земат децата, бидејки немаат парно греење. Скопјани, децата, пензионерите мрзнат поради неспособноста на ДПМНЕ, соопштуваат од СДСМ.
„Децата и изнемоштените луѓе, во 21 век се оставени на милост и немилост на несподобните директорчиња од ДПМНЕ и министерката за енергетика, блиска до Мицкоски. Во исто време неспособноста на ДПМНЕ го загрозува и снабдувањето со струја на цела Македонија. Двата системи се проектирани да функционираат на начин што ќе ја поделат обврската во затоплување – дел со парно а доминатен дел со струја. Сега кога граѓаните се оставени со саати без парно се принудени да бараат алтернатива, да вклучуваат греење на струја, да се згрејат на овие минусни температури. Аматерски од владата е што дозволи ова да се случи и што не го санира дефектот брзо, со што го загрозува снабудвањето и со струја и со парно. Целосна одговорност за хаосот во енергетскиот сектор е кај минстерката за енергетика, Сања Божиновска која нема капацитет да менаџира со овој важен сегмент. Ги повикуваме веднаш да формираат кризен штаб, брзо да се реагира и веднаш граѓаните да добијат греење. Во време на голема светска енергетска криза СДСМ не дозволи да има прекини, граѓаните имаа непречено и струја и парно греење!“, се нагласува во соопштението од СДСМ.
АД ЕСМ Снабдување информираат дека поради зголемени загуби на вода во топлификациската дистрибутивна мрежа кај дел од потрошувачите ќе има намалена испорака на топлинска енергија.
– Екипите на Дистрибуција на топлина се на терен и активно работат на изолирање на проблемот, со цел воспоставување стабилен хидрауличен режим во системот и нормализација на снабдувањето со топлинска енергија. Се користат сите расположливи ресурси, а екипите преземаат засилени мерки и вложуваат максимални напори за што побрзо воспоставување на редовно снабдување со топлина до потрошувачите, стои во информацијата од ЕСМ Снабдување.
