За денеска се најавени состаноци на просветните работници во голем број училишта во Србија на кои ќе се одлучува за натамошниот тек на прекинот на наставата, јавија српските медиуми.
Според податоците на секторот за образование, 59 отсто од основните и 76 отсто од државните средни училишта во Нови Сад вчера најавија прекини.
Утрово во голем број училишта и гимназии во Нови Сад се присутни родителите и децата кои не дозволуваат да влезат инспектори и даваат поддршка за просветните работници. Во техничкото училиште „Милева Мариќ Ајнштајн“ во Нови Сад не започна второто полугодие, откако учениците вчера организираа блокада, а наставниците изгласаа прекин на работата до понатамошно известување. Како што јави репортерот на агенцијата Бета, родителите се собираат пред училиштето во знак на поддршка на наставниците.
Во ОУ „Светозар Марковиќ Тоза“ каде што родителите вчера влегоа во канцеларијата на директорот, по што беше повикана полиција, денеска имаше уште еден собир.
Во ОУ „Васа Стајиќ“, на собир за поддршка на наставниците, еден од родителите Дарко Шпер на насобраните им порача дека треба да бидат еден за друг и да не се срамат од своите постапки.
Родителите се собраа и во основните училишта „Васа Стајиќ“, „Ѓуро Даничиќ“, „Бранко Радичевиќ“ и „Прва Војвоѓанска Бригада“. Тие носеа транспаренти со натписи „Не и се заканувај на мојата учителка“, „Родителите се со вас“, „Не се плашиме, се солидаризираме“, „Ние не сме Хамас, ние сме лути мамас“ (“Nismo Hamas nego Angry mamas”).
Поради најавата дека денеска во школото ќе дојде просветна инспекција, учениците од Десеттата белградска гимназија утрово организираа митинг за поддршка на своите професори.
Околу 8 часот и 30 минути во дворот на гимназијата се собраа голем број ученици од Десетата гимназија, сегашни и поранешни, како и нивни родители и граѓани кои живеат во близина за да им дадат поддршка на сите наставници кои работат во ова училиште, бидејќи беше најавено доаѓање на просветна инспекција.
Вчера имаше и голем број пријави за притисоци и закани кон наставниците и директорите на училиштата кои ја прекинаа работата, јавија српските медиуми.
Дел од вработените во Поштата на Србија денеска ќе почнат со самоорганизиран прекин на работа во знак на поддршка на студентите.
