Незадовоството од граѓаните во регионот од високите цени изразено преку акции за бојкот на продавниците, бензиските пумпи, рестораните и кафулињата по Хрватска, Црна Гора, и Босна, стигна и во Македонија.
На еднодневен бојкот на продавниците во петок, 31 јануари повикуваат граѓаните на Македонија на социјалните мрежи.
Организаторите ги повикуваат граѓаните да се приклучат кон бојкотот за да се испрати јасна порака до одговорните за економската состојба.
„Попусто попусти кога цените се исти. Повикуваме на масовен бојкот во петок. Воздржете се од купување во големите маркети, избегнувајте ги помалите маркети. Сакаме да испратиме порака дека граѓаните нема да ги толерираат овие нереални поскапувања“, се вели во повикот на социјалните мрежи.
Одговорните пак за економската состојба велат дека го поддржуваат најавениот бојкот.
Владејачката ВМРО-ДПМНЕ преку соопштение истакнуваат дека ја поддржува иницијативата за бојкот на маркетите.
„ВМРО-ДПМНЕ ја поддржува иницијативата за бојкот на маркетите. Нема никаква економска причина надвор од своеволноста на трговците, која тоа го оправдува освен голиот профит на грбот на граѓаните. Сигурни сме дека институциите активно ќе се спротивстават на забеганоста на дел од маркетите и состојбата во која без никаков индикатор кој предизвикува инфлација тие нечовечно да ги зголемуваат цените и да учествуваат директно во зголемување на сиромаштијата богатејќи се на грбот на граѓаните преку уцена и монопол и општествено неодговорен однос“, велат од ВМРО-ДПМНЕ.
Од СДСМ велат „граѓаните се спремаат за бојкот на маркетите затоа што Владата не ги заштити“.
„Владата и ВМРО-ДПМНЕ и директно Мицкоски се целосно виновни што трендот од регионот за бојкотирање на маркетите се пренесува и кај нас. Во моментот се најавуваат бојкоти на маркетите од страна на граѓаните по социјалните мрежи. Неспособноста и немањето желба на Мицкоски да се справи со ненормалниот раст на цените, лажните ПР кампањи за кошничките и негрижата за граѓаните, доведуваат до тоа граѓаните сами да се справуваат со проблемот’, соопштуваат од СДСМ.
Ј. Ѓ.
