Студентите на државните универзитети ширум Србија со месеци ги блокираат факултетите и организираат протести, барајќи да се откријат одговорните за падот на настрешницата на неодамна реновираната Железничка станица во Нови Сад, во која загинаа 15 лица, како и да се казнат оние кои напаѓаа граѓани и академици за време на мирни блокади.
Овој бунт од универзитетот се прошири и на другите делови од општеството, така што денешните протести ги најавија вработените во основните училишта во Белград, работниците на Електростопанството на Србија, како и вработени во градскиот транспорт во Белград. Граѓаните на повеќе белградски општини за вечерва најавија протестна прошетка за поддршка на студентите и просветните работници.
Студенти во блокада и групи граѓани и вчера во Белград, Нови Сад и други градови 15 минути блокираа одредени патишта, наведувајќи дека им оддаваат почит на жртвите од трагедијата во Нови Сад и бараат одговорност.
Во Нови Сад се одржаа неколку протестни собири. Студентите во блокадата организираа акција што ја нарекоа „Потрага по ректорот“, која започна со собир пред Ректоратот, продолжи со протестен марш до ДИФ, матичниот факултет на ректорот Дејан Мадиќ, а заврши пред зградата на Собранието на Војводина.
Студентите во блокадата изјавија дека го „бараат“ ректорот за кој тврдат дека одбива да закаже седница на Сенатот на чиј дневен ред би било негово разрешување.
Мадиќ вчера соопшти дека, бидејќи зградата на Ректоратот е под блокада, ректорот не е во можност физички да биде присутен, но дека цело време е присутен со „електронски и други соодветни средства“.
Тој изјави и дека ќе се најдат најдобри одржливи решенија за што поскоро да се организира седницата на Сенатот.
Во Нови Сад се одржа собир на просветни работници кои се во прекин на наставата, родители на ученици и група граѓани каде се одржа состанок на директорите на новосадските основни и средни училишта, јавуваат медиумите.
Собирот беше најавен пред ОУ „Иван Гундулиќ“, поради информации дека за време на суспензијата ќе им бидат намалени платите на наставниците, но протестниот состанок се одржа пред Спенс откако се дозна дека таму се одржува состанокот на директорот.
Средношколците во блокадата од Нови Сад организираа протестна прошетка до Футог, наведувајќи дека целта им е да им дадат поддршка на учениците од Земјоделското училиште во, како што наведоа, „конфронтација со училишната управа и покрај сите закани од истата, за да влезат во блокада“.
Студенти и професори во блокадата во Суботица започнаа протестна прошетка до населбата Бајмок.
На чело на колоната беа земјоделци со трактори, а колоната ја обезбедуваше сообраќајната полиција, пишуваат медиумите.
Групи студенти од крајот на ноември ги блокираат факултетите барајќи да се исполнат четири барања, а претставници од надлежните наведуваат дека нивните барања се исполнети и ги повикуваат на дијалог да кажат што не е исполнето. Претставници на Универзитетот во Белград и на Владата на Србија вчера разговараа за четвртото барање на студентите во блокадата и измените на Законот за високо образование.
Четвртото барање се однесува на подобри услови и зголемување на буџетот за високото образование за 20 проценти.
Д. Т. / Цивил Медиа
