Американскиот претседател Доналд Трамп денеска објави дека „целосно ќе престане федерално финансирање на училишта и универзитети кои дозволуваат нелегални протести“.
– Агитаторите ќе бидат затворени и/или трајно депортирани во нивните матични земји. Американските студенти ќе бидат трајно протерани или, во зависност од криминалот, ќе бидат уапсени, напиша тој на својата социјална мрежа „Truth Social“, без да прецизира за кои демонстрации станува збор.
Во неколку американски универзитетски кампуси минатата година беа одржани пропалестински демонстрации кои Трамп остро ги осуди за време на неговата изборна кампања.
Американската влада вчера најави раскинување на договорот вреден 50 милиони долари со престижниот њујоршки универзитет Колумбија, обвинувајќи го дека не ги заштитил своите еврејски студенти од поддржувачите на Палестинците.
Американското Министерство за образование го критикуваше Универзитетот Колумбија поради неговиот „очигледен неуспех да биде одговорен“ пред сите негови студенти, што „покренува многу сериозни прашања за неговата способност да продолжи да соработува со владата на Соединетите држави“.
Додека некои конзервативни држави на американскиот југ ја ограничуваат наставата за расизам или сексуалност, Трамп дури ја објави својата намера да го укине федералното Министерство за образование.
Тој за шефица на тоа тело ја назначи Линда Мекмахон, поранешната шефица на организацијата за борење, и ѝ даде „задача да остане без работа“.
Образовниот систем во САД главно е децентрализиран, но федералната влада има значително влијание врз финансирањето, особено на училиштата во сиромашните области и за децата со попреченост.
Трамп веќе прекина неколку видови финансирање на училишта поради трансродови и други политики за различности што тој ги отфрла.
Образованието е клучно бојно поле за американските конзервативци, кои ги обвинуваат училиштата дека ги индоктринираат децата со ширење на идеите на движењето „Woke“, термин за прогресивни погледи за сексуалноста и расата.
