Претседателот Доналд Трамп синоќа го собори рекордот на поранешниот претседател Бил Клинтон за говорот за Состојбата на Унијата или за говорот пред заедничката седница на Конгресот.
Говорот на Трамп траеше еден час, триесет и девет минути и 32 секунди, според податоците собрани од Универзитетот Калифорнија-Санта Барбара, Проектот за американското претседателство. Последниот говор за Состојбата на Унијата на Клинтон во 2000 година траеше еден час, 28 минути и 49 секунди.
Проектот за американското претседателство гo следи времето на говорите за Состојбата на Унијата од 1964 година, кога го одржал Линдон Б. Џонсон.
Говорите пред Конгресот траеја во просек околу еден час и 20 минути во првиот мандат на Трамп, а најдолг беше говорот за Состојбата на Унијата во 2019 година со траење од 1:22:25.
Трамп ги бранеше активностите од раните денови на неговата администрација, вклучувајќи ги тарифите кон Мексико и Канада, во обид да предизвика реторички шок и восхит.
Најдолгиот говор станува реторичка битка
Говорот брзо се претвори во огледало на поделената нација, при што Трамп ги напаѓаше либералните опозициски членови на Конгресот, а неколку демократи започнаа протести низ целата собраниска сала.
Претставникот Ал Грин, демократ од Тексас, стана и извика: „Немаш мандат“, пред да биде наредено од страна на републиканскиот Спикер на Домот, Мајк Џонсон, да биде отстранет. Грин најави во февруари дека ќе поднесе обвиненија за импичмент против Трамп поради „неправда во Газа“.
„Ќе го прифатам казнувањето. Вредно е за да им покажеме на луѓето дека има некои од нас кои ќе се спротивстават на желбата на овој претседател да го намали Медикер, Медикеид и Социјалната сигурност,“ изјави Грин за новинарите, според снимката на CSPAN.
Додека Трамп се жалеше на поддршката од демократите, демократскиот претставник од Калифорнија, Гил Циснерос, извика: „Но, берзата“, додека демократскиот претставник од Мичиген, Рашида Тлаиб, извика: „Спасете Медикеид“.
Многу демократи ја напуштија салата за време на говорот, а некои истакнаа црни маици со зборот „RESIST (Отпор)“ напишан со бели букви додека излегуваа.
Некои од оние кои останаа до втората половина на говорот започнаа да викаат, а потоа и да пееат „6-ти јануари“, додека Трамп зборуваше за одбрана на полицајците во текот на својот говор.
Како се споредуваат говорите на Трамп и Бајден за Состојбата на Унијата?
Говорите на поранешниот претседател Џо Бајден пред Конгресот во текот на неговиот мандат се движеле околу еден час.
Говорите на претседателот Бајден пред Конгресот ги имаат следните времетраења:
- 2021: Малку над 1 час и 5 минути
- 2022: Малку под 1 час и 2 минути
- 2023: 1 час и 13 минути
- 2024: Малку над 1 час и 7 минути
Кој го има најкраткиот говор за Состојбата на Унијата?
Ричард Никсон го има најкраткиот записан говор за Состојбата на Унијата, чиј говор на 20 јануари 1972 година траел само 28 минути и 55 секунди.
Преземено: USA Today
Б. Т.
