Во месецот кога светот ја слави борбата за правата на жените, македонската јавност сведочи на политички судир околу родовата еднаквост и односот кон жените во политиката. Изјавата на пратеничката од СДСМ, Јована Тренчевска, ги отвори прашањата за говорот на омраза, дискриминацијата и (не)функционирањето на механизмите за заштита на жените во политиката.
Тренчевска ја обвини пратеничката од ВМРО-ДПМНЕ, Гордана Димитриеска-Кочоска, за изјави со кои, според неа, биле повредени жените во државата и граѓаните во целина. Според неа, наместо извинување или оставка од морални причини, јавноста добила дополнителни омаловажувања и дискриминација.
Проблемот се продлабочи кога Клубот на пратенички – тело кое треба да го штити дигнитетот на жените во политиката – првично постигнал договор да излезе со реакција против секоја форма на дискриминација врз жените. Сепак, како што тврди Тренчевска, пратеничките од ВМРО-ДПМНЕ ја повлекле својата поддршка за таа реакција само неколку часа подоцна.
„Кој им се јави и кој ги предомисли, треба тие да кажат?“ – прашува Тренчевска, алудирајќи на можни политички притисоци или влијанија.
Таа нагласува дека премолчувањето на говорот на омраза оди на штета на женските права и ја доведува во прашање суштината на постоењето на Клубот на пратенички и Комисијата за еднакви можности.
„Со ваквото однесување се испраќа порака дека женската солидарност е мисловна именка во нашето општество“, предупредува Тренчевска, потенцирајќи дека ова се случува токму во пресрет на 8 Март – Денот на жената, кога традиционално се оддава почит на вековните борби за еднаквост.
