Генералниот секретар на Обединетите нации, Антонио Гутереш денеска покрена нова иницијатива за реформирање на светската организација, велејќи дека е потребна поради големите кратења на финансиските средства поради глобалните предизвици. Обединетите нации имаат 193 членки и наскоро ќе прославуваат 80 години од своето постоење.
Гутереш отфрли каква било поврзаност помеѓу неговата иницијатива на ОН 80 и намалувањата на хуманитарните и другите програми за помош финансирани од САД, сега под администрација на претседателот Доналд Трамп.
Тој и неговиот сојузник Илон Маск спроведуваат големи кратења на федералните трошоци, вклучително и за хуманитарни потреби ширум светот.
„Зборуваме за сосема различни процеси, методологии и цели. Ова е продолжување и интензивирање на работата што отсекогаш сме ја правеле“, изјави Гутереш.
Според него, целта на иницијативата на ОН е да се презентираат предлози до земјите-членки за подобрување на начинот на функционирање на светската организација, да се разгледаат зголемениот број мандати на Советот за безбедност и Генералното собрание на ОН и да се спроведат структурни промени за да се насочат операциите.
Иницијативата на ОН 80, рече тој, не е само за реформирање на Обединетите нации, туку е таму и за „подобро да им служи на луѓето чии животи зависат од нас“ и „даночните обврзници ширум светот кои се одговорни за сè што правиме“.
Иницијативата ќе го опфати не само Секретаријатот на ОН, туку и сите негови фондови и агенции и канцеларии во Женева, Најроби и Виена.
– ОН80 ќе биде предводен од заменик-генералниот секретар на ОН за политика Гај Рајдер, кој ќе ја предводи работната група од највисоките функционери од системот на ОН, рече Гутереш.
Буџетот на ОН за 2025 година, усвоен во декември минатата година, изнесува 3,72 милијарди долари.
