Уште 17 наводни припадници на банди се депортирани од САД во озлогласениот затвор со максимална безбедност во Ел Салвадор, соопшти државниот секретар Марко Рубио. На почетокот на март, Вашингтон овде испрати група од 261 лице, претежно составена од Венецуелци.
Постапките на администрацијата на претседателот Доналд Трамп укажуваат на строго држење до политиката на депортации во елсалвадорскиот Центар за задржување на терористи, што се смета за најголемиот затвор во светот, познат и како CECOT (Centro de Confinamiento del Terrorismo), напиша синоќа „Волстрит журнал“.
Групата била составена од „насилнички криминалци“, членови на венецуелската банда „Трен де Арагуа“ и елсалвадорската МС-13, изјави Рубио во порака на „Икс“, додавајќи дека тие биле „убијци и силувачи“. Пентагон пак, укажа дека операцијата била „успешна антитерористичка мисија“.
Наиб Букеле, претседател на Ел Салвадор, ја пофали „заедничката воена операција“. Видеото со драматична филмска музика ги прикажува депортираните како се спроведуваат од војници при симнување од товарен воен авион, се транспортираат до казнениот дом каде им се бричат главите и се заклучуваат во ќелии.
Огромниот затвор е изграден од Букеле и е главен дел од неговата кампања за борба со нарко картелите во земјата. Американската влада веќе по втор пат испраќа Венецуелци овде, за кои тврди дека се членови на насилната улична банда. Затворот можае да прими 40.000 затвореници и таму моментално лежат околу 15.000 осомничени членови на банди од Ел Салвадор и околните земји, од кои најголем дел се осудени на доживотен затвор.
Борците за човекови права укажуваат дека Букеле, кој победи на демократски избори во 2019 година, станува авторитарен лидер и многу од овие затвореници се држат неправедно. Трамп бара начин да започне со депортации овде и на осудени државјани на САД, јавија дел од американските медиуми. Во посета на објектот минатата недела беше министерката за внатрешна безбедност Кристи Ноeм.
Засега, Вашингтон се повикаува на закон од 18 век, познат како Акт за непријатели странци (Alien Enemies Act), што дозволува депортации без судски процес на лица од земји со кои САД се во војна. Трамп се повикува на овој закон кога вели дека бандата, позната како „TdA“, навлегла во САД и правела хаос.
Американските власти укажуваат дека депортациите во елсалвадорскиот затвор се со цел да се изврши притисок врз Венецуела да прифати летови со депортирани државјани. Јужноамриканската земја отпрвин не сакаше да го прави тоа, но минатата недела почна да прифаќа летови со депортирани од САД. Високи функционери ги пречекувале депортираните, а владата изјави дека „миграцијата не е злосторство, и правиме сè за да ги спасиме нашите браќа киднапирани во Ел Салвадор“.
