Европскиот суд за човекови права ги информираше граѓанските организации дека во понеделник, на 31 март, добил одговор од Република Србија во врска со наводите за можна употреба на звучно оружје на протестот во Белград на 15 март 2025 година, се вели во соопштението на белградскиот Центар за човекови права, јавуваат српските медиуми.
Како што наведуваат, судот во Стразбур ги покани граѓанските организации да достават коментари за одговорот на државата до 8 април. Во истиот период, до 8 април, Европскиот суд за човекови права ја покани Република Србија да ги достави своите коментари по поднесокот поднесен од граѓанските организации до судот во понеделник на 31 март, во кој тие го информираа Судот за здравствената состојба на подносителите.
„Да потсетиме, на 24 март Европскиот суд за човекови права побара од Република Србија да се изјасни дали биле употребени незаконски средства против демонстрантите на протестот во Белград на 15 март, која е правната основа за наводната употреба на такво оружје и кои се мерките за заштита од самоволна употреба на такви средства.
Нашите организации ќе продолжат да им помагаат на граѓаните во утврдувањето на вистината за настанот од 15 март, заштитувајќи ги нивните права и интереси во постапките пред меѓународните и домашните тела. Поради оваа причина, и покрај јасниот интерес на јавноста за содржината на одговорот на Република Србија, во оваа фаза од постапката ќе објавиме нови информации по 8 април, откако ќе доставиме коментари за одговорот на државата“, се наведува во соопштението.
Д. Т. / Цивил Медиа
