Масовни отпуштања почнаа денеска во големите американски здравствени агенции, додека администрацијата на Доналд Трамп тргнува во сеопфатно и научно оспорувано реструктуирање кое ќе укине 10.000 работни места.
Американскиот министер за здравство Роберт Ф.Кенеди рече дека отпуштањата се дел од големата реформа на неговиот оддел, со цел пренасочување на напорите за превенција на хроничните болести.
Нарекувајќи ги „тешки моменти за сите нас“, Кенеди рече „нашите срца се со оние кои ги загубија своите работни места“.
– Но, реалноста е јасна: тоа што го правевме не функционира, додаде тој, жалејќи се дека „Американците секоја година се се поболни“ и покрај зголеменото трошење на федералните агенции кои ја водат американската здравствена политика.
