На денешната седница на собраниската Комисија за транспорт, дигитална трансформација, животна средина и просторно планирање е Предлог на законот за изменување и дополнување на Законот за медиуми.
Како што се посочува во образложението објавено на собраниската веб-страна, една од главните цели на Законот за медиуми е гарантирањето на слободата на изразување и слободата на медиумите. Целта на овој Предлог на закон, како што се посочува, е внесувањето на онлајн медиумите-интернет портали во делот на дефиниции, каде би се набројале покрај веќе наведените „весници, магазини, програми на радиото и телевизијата, телетекст и други средства за дневно или периодично објавување на уреднички обликувани содржини во пишана форма, звук или слика, со цел да се информираат и задоволат културните, образовните и другите потреби на пошироката јавност“. Предвидено е онлајн медиумите во Законот за медиуми да бидат претставени под терминот „онлајн медиуми-интернет портали“.
-Во делот од Законот каде се дефинира издавачот на медиум се предлага дополнување со дејноста која ја вршат онлајн медиумите-интернет портали, покрај дејностите кои ги вршат печатените медиуми и радиодифузерите. Измените и дополнувањата на Законот за медиуми ќе бидат и во насока на воспоставување Регистар на онлајн медиуми-интернет портали, кој јасно ќе ги определи критериумите со податоците за нивно регистрирање/евидентирање. Со донесувањето на измените на законското решение ќе се испочитуваат препораките зацртани во Патоказот за владеење на правото, кој ги опфаќа клучните реформски приоритети во „Поглавјето 23 – Правосудство и темелни права“ во делот на слободата на изразување. Имплементацијата на препораките содржани во европските политики ќе овозможи зголемена транспарентност на онлајн медиумите во делот на сопственоста, рекламирањето и финансирањето, подобрување на конкурентноста, заштита на уредничката независност, подобрени права на новинарите. На овој начин, онлајн медиумите ќе ги остварат сите права, но и обврски како и сите други медиуми, се наведова во образложението за Предлог на законот за изменување и дополнување на Законот за медиуми.
Во Собранието денеска седница ќе одржи и Комисијата за култура и туризам, на чиј дневен ред е Предлог на законот за изменување и дополнување на Законот за авторското право и сродните права во прво читање.
