Студенти и членови на академската заедница на Србија со велосипеди тргнаа од Нови Сад во акцијата „Тур де Стразбур“, со намера дополнително да им укажат на европските претставници за состојбата во Србија, која се соочува со криза во бранот протести по трагедијата на железничката станица во Нови Сад во ноември минатата година, јавуваат српски медиуми.
На студентите им се приклучија и репортери од одредени белградски медиуми, а студентите за патувањето ќе известуваат на социјалните мрежи.
Смртта на 16 претежно млади луѓе по падот на настрешницата на 1 ноември на неодамна реновираната железничка станица во Нови Сад предизвика бран протести обвинувајќи ја владата за коруптивни практики и невешто извршени работи. Студентите започнаа блокада на повеќе од 60 факултети на сите четири државни универзитети, откако приврзаниците на владејачката партија ги нападнаа за време на комеморативната блокада додека тие со молчење им оддадоа почит.
Д. Т. / Цивил Медиа
