Украина можеби ќе биде принудена привремено да отстапи некои територии на Русија, изјави градоначалникот на Кијив, Виталиј Кличко, во интервју за Би-Би-Си објавено на 25 април, додека притисокот на САД за мировен договор со Москва се зголемува, пренесува ЦивилМедиа.
„Во моментов (има) многу разговори за можно решение. Едно од сценаријата е… да се отстапи територија. Тоа не е фер. Но, за мир, привремен мир, можеби тоа може да биде решение. Привремено“, рече Кличко во објавен извадок од интервјуто.
Тој додаде дека Украинците „никогаш нема да прифатат окупација“ од Русија.
Коментарите на Кличко доаѓаат во време на обновена дипломатска активност по смртоносниот руски ракетен и беспилотен напад врз Кијив во кој загинаа 12 лица, а речиси 90 беа повредени. Нападот се случи само еден ден откако Кремљ ги повтори своите барања Украина да отстапи окупирана територија и Западот да ја прекине својата воена помош за Кијив.
Најновиот предлог на администрацијата на Трамп за прекин на тоталната војна на Русија против Украина наводно вклучува де јуре признавање од страна на САД на контролата на Москва врз Крим, заедно со де факто признавање на нејзината делумна окупација на други украински региони – Луганск, Донецк, Херсон и Запарошка област.
Се чини дека Кличко е првиот висок украински политичар кој сугерира дека Украина можеби ќе треба да разгледа привремени територијални компромиси.
Порано оваа недела, претседателот Володимир Зеленски изјави дека Украина не добила никакви официјални предлози за територијални отстапки како дел од потенцијалните мировни разговори со Русија од САД или други партнери. Тој, исто така, постојано повторуваше дека Кијив нема да ги признае окупираните територии како руски.
И покрај неговата популарност во странство, Кличко се соочува со критики во Украина за неговото справување со главниот град. Градоначалникот на Кијив и Зеленски се политички противници. Кличко постојано ги обвинува претседателот и неговиот тим дека се обидуваат да го поткопаат неговиот авторитет.
Во разговор за програмата „Тудеј“ на BBC Radio 4 од неговата канцеларија во центарот на Кијив во четвртокот, Кличко истакна дека е „одговорен за главниот град на Украина“, опишувајќи го како „срцето“ на земјата разурната од војна.
Тој рече дека претседателот Володимир Зеленски можеби ќе биде принуден да прифати „болно решение“ за да постигне мир.
На прашањето дали Зеленски разговарал со него за какви било можни детали за военото решавање, градоначалникот на Киев рече: „Не“.
„Претседателот Зеленски го прави тоа сам. Тоа не е моја функција“, додаде тој.
На прашањето дали Зеленски разговарал со него за какви било можни детали за военото решавање, градоначалникот на Кијив рече: „Не“.
Д. Мишев / Цивил Медиа
