Во знак на солидарност со семејствата на жртвите на трагедијата во Кочани, фотографот Ванчо Џамбаски објави фотогалерија со 460 фотографии од протестот „Марш за ангелите“ кои се слободни за преземање и реобјавување, пренесува Мета.мк.
Протестниот марш се одржа на 30 април во Скопје, во организација на семејствата на жртвите од трагичниот пожар што на 16 март го зафати импровизираната дискотела „Пулс“ во Кочани, при што загинаа 62 лица, претежно млади.
Маршот започна пред зградата на Јавното обвинителство, а потоа продолжи пред зграда на Собранието. Родителите, роднините на загинатите и неколку стотици поддржувачи, меѓу кои и групи студенти, побараа одговорност за трагедијата, како и конкретни институционални мерки за да се спречат вакви катастрофи во иднина. По настанот на социјалните мрежи се појавија низа критики заради пасивноста на жителите на Скопје кои не го поддржале маршот со своето присуство.
Фотоактивизмот нуди можност за граѓаните кои би сакале да ја искажат својата поддршка за семејствата на настраданите да го сторат тоа преку споделување на фотографии, видеа или линкови за настаните на кои не можеле да присуствуваат лично.
Така, фотографиите од галеријата за „Маршот за ангелите“ може бесплатно да се користат и од комерцијални и од некомерцијални медиуми, како и од индивидуи на социјалните мрежи, под единствен услов при објавување да се наведе и името на авторот, и по можност, линк кон изворот.
По објавувањето на галеријата, низа граѓани што учествуваа на протестот или не можеле да бидат присутни но сочуствуваат со жртвите, почнаа да го споделуваат линкот или поединечни слики.
Ваквиот вид активизам претставува и поддршка за работата на непрофитните, малите и локалните медиуми, кои немаат можност да испратат фоторепортери на настани, поради ограничени финансиски и човечки капацитети.
Со објавување фотографии кои се слободни за користење им се помага и да избегнат ризик од тужби од комерцијалните фотографи и фотоагенции, чии слики објавени на интернет може да ги преземат без дозвола. Преземањето без дозвола ги изложува медиумите на тужби, бидејќи освен ако не е јасно назначено дека може да се употребат, се подразбира дека фотографиите „од интернет“ се заштитени според Законот за авторски и сродни права.
Означувањето на фотографии слободни за преземање се користи преку нивно примена на лиценци Криејтив комонс, како во случајот на Џамбаски, или други лиценци како GNU, или пак давање во Јавен домен. Еден важен светски ресурс кои ги користи ваквите лиценци е Википедија.
