Земјите од Европската Унија се на добар пат да ги намалат емисиите на штетни стакленички гасови за 54 проценти до 2030 година, приближувајќи се до целта на ЕУ од 55 проценти, соопшти денеска Европската комисија.
Проценката се базира на националните планови за клима и енергија во кои земјите-членки треба детално да објаснат како планираат да ја постигнат долгорочната цел на блокот да станат климатски неутрални до 2050 година и да ги намалат емисиите за повеќе од половина до 2030 година во споредба со нивоата од 1990 година, пренесе ДПА.
Комисијата ги повика земјите-членки да останат на курсот и целосно да ги спроведат своите планови.
– Емисиите од 1990 година се намалени за 37 проценти, додека економијата порасна за речиси 70 проценти – докажувајќи дека климатската акција и растот одат рака под рака, рече комесарот на ЕУ за климата, Вопке Хоекстра.
– Сега мора да градиме врз основа на овој моментум, нагласи тој.
– Инвестирањето во чисти технологии и иновации е од суштинско значење за индустриската конкурентност и отвора нови пазари за компаниите од ЕУ. Нашата посветеност на чистата транзиција им дава јасност на инвеститорите и ја зајакнува отпорноста и просперитетот на Европа рече Хоекстра.
Тој нагласи дека сега е одлучувачки момент и оти секој сектор во секоја земја-членка мора да придонесе за реализација.
