По повикот на премиерот Христијан Мицкоски од последната седницата за пратенички прашања опозицијата да поддржи измени на Изборниот законик за една изборна единица, лидерот на Социјалдемократскиот сојуз Венко Филипче изјави дека се подготвени да разговараат за предлогот, но дека за ваквиот предлог треба да се разговара со сите политички партии.
– Спремни сме да дискутираме за сите теми, вклучително и за изборниот модел, но тоа мора да биде инклузивен процес. Покрај прашањето за една изборна единица, тука се и прашањата за цензусот и за отворените листи – рече Филипче.
Мицкоски го повика СДСМ да ги поддржи измените на Изборниот законик, со кои, како што рече, ќе се воведе една изборна единица и ќе се овозможи и на дијаспората да гласа.
– Пратеничката група на ВМРО-ДПМНЕ ќе гласа за измените. Верувам дека ова е историски чекор за демократијата – порача премиерот.
Портпаролот на ЛДП, Љубен Аврамовски изјави дека Либерално-демократската партија и понатаму останува доследна во својата заложба за темелни изборни реформи.
– И денес, како и претходно, даваме силна поддршка за воведување на една изборна единица, отворени листи, како и вклучување на предлозите од граѓанскиот сектор за независни листи во креирање на новиот Изборен законик. Ова не е нова иницијатива за ЛДП. Нашите пратеници во два претходни парламентарни состави поднесуваа предлог-закони за истата оваа реформа. За жал, тогаш тие иницијативи не добија поддршка. Но ние не се откажуваме, посочува Аврамовски.
Тој додава дека денес (понеделник), преку претседателката на ЛДП и пратеничка, Моника Зајкова, ЛДП повторно ќе поднесе предлог закон до Собранието за воведување на една изборна единица и отворени листи.
ЛДП ги повикува сите политички партии како и граѓанскиот сектор на отворен дијалог и заедничка работа, со една цел – конечно усвојување фер, праведен и современ изборен модел, кој ќе им служи на сите граѓани подеднакво.
Партијата за движење на Турците (ТХП) ја изразува својата подготвеност да учествува во дебата за промени во изборниот модел и ја поддржува иницијативата за отворање на широк дијалог околу измени на Изборниот законик.
Сепак, како што се наведува во соопштението, останува отворено прашањето дали премиерот има јасна визија и план за тоа како ќе се обезбеди правичен и инклузивен изборен модел кој ќе овозможи реална и фер претставеност на помалубројните заедници во Собранието.
– Дали целта е навистина демократизација и еднаквост во изборниот процес, или пак повторно ќе се сведеме на модел во кој со 400–500 гласови ќе се избираат пратеници од дијаспората, додека гласот на помалубројните заедници останува занемарен, прашуваат од партијата.
Од ТХП, апелираат, како што велат, во овие клучни дебати, кои го засегаат темелот на демократското уредување на државата, да се отвори сериозен простор и за немнозинските заедници.
Од друга страна седум граѓански иницијативи, поднесоа барање до Собранието и до Министерството за правда да се направат итни измени на Изборниот законик.
Велат оставена е правна празнина откако Уставен суд ги укина членовите 17 и 18 од измените во Изборниот законик донесени на 7 март 2024, со кои партиите од власта и опозицијата здружено го зголемија прагот за потребни потписи на 1 отсто од гласачкото тело во изборна единица за учество на независните листи на изборите.
Горјан Јовановски од „Зелен хуман град“ вели дека во отсуство на дадени услови и критериуми треба да биде отворена, а не затворена можноста за кандидирање независни листи.
Граѓанските иницијативи бараат Министерството за правда и Собранието да ги вклучат и независните кандидати во работната група која ќе ги формулира одредбите за измена и дополнување на Изборниот законик. Исто така, бараат да се применува законската обврска за пристап до Избирачкиот список на сите учесници на изборите.
Дестан Јонузи
