Граѓанската иницијатива „Сапорт Кочани“ ја исплати фактурата за набавка на првата тура компресивна облека наменета за повредените од трагичниот настан во Кочани, во вредност од 923.458 денари.
Средствата за набавката, како што соопштија од иницијативата, биле целосно обезбедени преку донации од граѓани, компании и поддржувачи од земјата и странство.
Од „Сапорт Кочани“ информираат дека компресивната облека е нарачана и се очекува да пристигне во Кочани околу 16 јуни. Дополнително, веќе се обезбедени средства и за втора тура на облека, а на 16 и 17 јуни повторно ќе пристигнат експерти од Бугарија кои ќе започнат со земање индивидуални мерки за новата нарачка.
Особена благодарност од Support Kocani беше упатена до компаниите Julius Zorn GmbH и Health 2000, кои одобриле попуст во вредност од 19.600 лева, со што
значително се олеснило обезбедувањето на неопходната медицинска помош за поголем број повредени.
-Иако некои процеси бараат време, ова е доказ дека кога има волја – има и начин. Ви благодариме на сите вас – граѓани, пријатели и непознати хумани срца – што покажавте што значи вистинска солидарност, се наведува во соопштението.
