Во законодавниот дом денеска се одржа 53. пленарна седница на која беа разгледани 14 од вкупно 20 точки на дневниот ред.
Предлогот за изменување и дополнување на Изборниот законик, по скратена постапка поднесен од пратеничката и претседателка на Либерално-демократска партија Моника Зајкова за воведување на една изборна единица со отворени листа не помина на денешната седница. За предлогот гласаа само 19 пратеници.
На седницата мнозинството пратеници ги донесоа Одлуката за распишување јавен оглас за избор на претседател и членови на Советот за граѓански надзор, измените на Законот за фитофармација, измени и дополнувања на Законот за животната средина, потоа измените на Законот за заштита од вознемирување на работно место, измените на Законот за високото образование, како и Финансискиот извештаи на Агенцијата за супервизија на осигурување за 2024 година.
Во прво читање поминаа Предлог на закон за изменување на Законот за волонтерството, Предлог на закон за изменување на Законот за младински додаток, Предлог на закон за ставање во употреба на техничка опрема за транспорт, Предлог на закон за електронските комуникации, Предлог на закон за безбедност на мрежни и информациски системи, Предлог на закон за изменување и дополнување на Законот за електронски документи, електронска идентификација и доверливи услуги, Предлог на закон за архивски материјал и архивска дејност, Предлог на закон за изменување и дополнување на Законот за Царинската тарифа.
На седницата со 78 гласови „за“ помина Предлог законот за измени и дополнувања на Изборниот законик, по скратена постапка, кој го поднесе пратеникот од ВМРО-ДПМНЕ Никола Мицевски, со кој бројката на новиот праг за независните кандидати ќе биде одредена од големината на општината.
На прдолжението на седницата кое ќе биде дополнително закажано меѓу точките кои треба да се разгледаат е и Предлог законот за поддршка на настраданите во несреќата во дискотеката во Кочани и на членовите на нивните семејства, кој е во прво читање.
Претходно на седницата при усвојување на дневниот ред, координаторот на пратеничката група на ВМРО-ДПМНЕ, Никола Мицески ги обвини социјалдемократите и пратениците од редовите на Левица за политиканство, бидејќи, како што рече, не гласаа за усвојување на дневниот ред, иако по нивно барање точката за Кочани е ставена прва на дневниот ред.
