Додека членките на НАТО се подготвуваат за самитот во Хаг следната недела, генералниот секретар Марк Руте рече дека алијансата сега ја исполни својата 11-годишна цел за трошоци за одбрана.
-Со оглед на тоа што Португалија и Канада, исто така, се обврзаа да трошат два проценти од нивниот бруто домашен производ (БДП) за одбрана оваа година, целиот НАТО сојуз сега ја исполнува целта од два проценти, рече Руте на маргините на самитот на Групата седум во Канада. Тој го нарече тоа „навистина одлична вест“.
Но, со зголемувањето на притисокот од американскиот претседател Доналд Трамп за повеќе трошоци, се очекува одбранбената алијанса од 32 члена да се согласи на нова цел од најмалку 3,5 посто од националниот БДП на својот дводневен самит што започнува на 24 јуни. Дополнителни 1,5 проценти би биле издвоени за дополнителни трошоци поврзани со одбраната, како што е инфраструктурата, со што вкупната цел ќе достигне пет отсто, за што Трамп се залага веќе некое време.
Американскиот претседател постојано го критикуваше она што го смета за недоволни трошоци за одбрана од страна на европските сојузници и Канада, па дури и во неколку наврати се закани дека ќе ги повлече САД од НАТО поради ова прашање.
Единствената членка на НАТО што надминува 3,5 проценти од трошоците за одбрана како удел во БДП е Полска.
