Американските воени напади врз три нуклеарни објекти на Иран минатиот викенд не ги уништија основните компоненти на нуклеарната програма на земјата и веројатно само ја вратија назад за неколку месеци, според рана проценка на американските разузнавачки служби, опишана од седум лица информирани за неа, јавува Си-Ен-Ен.
Проценката, која претходно не беше објавена, е изработена од Агенцијата за одбранбено разузнавање, разузнавачкиот оддел на Пентагон. Таа се базира на проценка на штетите од битката спроведена од Централната команда на САД по американските напади, рече еден од изворите.
Анализата на штетата на локациите и влијанието на нападите врз нуклеарните амбиции на Иран е во тек и може да се промени како што ќе бидат достапни повеќе разузнавачки информации.
Но, раните наоди се во спротивност со повторените тврдења на Трамп дека нападите „целосно и тотално ги уништиле“ иранските нуклеарни објекти за збогатување. Министерот за одбрана Пит Хегсет, исто така, во неделата изјави дека нуклеарните амбиции на Иран „се уништени“.
Двајца од лицата запознаени со проценката рекоа дека залихите на збогатен ураниум на Иран не се уништени. Едно од лицата рече дека центрифугите се во голема мера „недопрени“. Друг извор рече дека разузнавачките служби процениле дека збогатениот ураниум бил преместен од локациите пред американските напади.
„Значи, проценката (на DIA) е дека САД ги вратиле можеби неколку месеци назад“, додаде ова лице.
Од Белата куќа го признаа постоењето на проценката, но не се согласуват со неа, пишува Си-Ен-Ен.
Трамп, кој во моментов е во Холандија каде што присуствува на самитот на НАТО оваа недела, го отфрли извештајот на Си-Ен-Ен во објава на Truth Social.
„Еден од најуспешните воени напади во историјата“, напиша Трамп во објавата со големи букви, додавајќи: „Нуклеарните постројки во Иран се целосно уништени!“
Американската војска соопшти дека операцијата поминала според планот и дека била „огромен успех“.
Сè уште е рано САД да имаат сеопфатна слика за влијанието на нападите, а ниту еден од изворите не опиша како проценката на DIA се споредува со ставот на другите агенции во разузнавачката заедница. САД продолжуваат да собираат разузнавачки информации, вклучително и од Иран додека ја проценуваат штетата.
Д. Т. / Цивил Медиа
