Израелскиот премиер Бенјамин Нетанјаху соопшти дека го номинирал американскиот претседател Доналд Трамп за Нобелова награда за мир, предавајќи му копија од писмото испратено до Нобеловиот комитет.
– Додека зборуваме, тој носи мир од земја во земја, од регион во регион, рече Нетанјаху на почетокот на официјалната вечера со Трамп во Белата куќа.
Американскиот претседател Доналд Трамп синоќа беше домаќин на израелскиот премиер Бенјамин Нетанјаху во Белата куќа, при што двајцата лидери разговараа за можен прекин на огнот во Газа и долгорочен мировен договор.
Третата посета на Нетанјаху во Вашингтон откако Трамп се врати во Белата куќа се случува во клучен момент. Американскиот претседател се надева да ја искористи инерцијата по неодамнешниот прекин на огнот меѓу Израел и Иран, по 12-дневната војна.
– Не мислам дека има блокада, работите одат добро, изјави Трамп пред новинарите пред почетокот на официјалната вечера со Нетанјаху.
Тој додаде дека е убеден оти Хамас е подготвен на прекин на огнот и дека сака средба.
„Тие (Хамас) сакаат состанок и сакаат прекин на огнот, рече Трамп на почетокот на официјалната вечера во Белата куќа со израелскиот премиер. На прашање од новинарите дали непотврдени извештаи за израелски жртви во северна Газа ќе влијаат врз преговорите, Трамп одговори: „Не мислам така“.
Специјалниот американски пратеник, Стив Виткоф, кој исто така присуствуваше на вечерата, изјави дека постои можност за брзо постигнување договор во рамките на индиректните преговори за примирје и ослободување на заложниците.
Портпаролката на Белата куќа, Каролин Левит, изјави дека Виткоф „има намера да отпатува во Доха подоцна оваа недела“ за да учествува во преговорите. Левит посочи дека главен приоритет на САД на Блискиот Исток е крај на војната во Газа и ослободување на сите заложници. Таа ги пофали Катар и Египет како „исклучително корисни партнери во медијацијата за мир и ставање крај на конфликтот еднаш засекогаш“.
Преговорите во Доха, посредувани од Катар, Египет и САД, се фокусираат на 60-дневен прекин на огнот во Газа и ослободување на заложниците кои сè уште ги држи Хамас.
Според предлогот, треба да запрат непријателствата во Газа најмалку 60 дена, постепено да се ослободат 10 израелски заложници, а да се вратат и посмртните останки на загинатите заложници. Во замена, Израел би ослободил голем број палестински затвореници.
За време на примирјето, страните би преговарале за долгорочен крај на војната.
Нетанјаху повторно ја отфрли можноста за создавање палестинска држава, истакнувајќи дека Израел „засекогаш ќе го задржи контролниот механизам за безбедност во Газа“.
– Луѓето нема повеќе да кажуваат: ‘Дајте им уште една држава’. Тоа би бил полигон за уништување на Израел, додаде тој.
