Канадскиот премиер Марк Карни доцна вчера во објава на „Х“ напиша дека неговата влада ќе продолжи да ги заштитува канадските работници и бизниси во трговските преговори со САД за ова прашање, додека тие работат на постигнување договор во рамките на повторно договорениот рок, кој сега е 1 август.
Ова уследи по царините против Канада што ги покрена вчера Доналд Трамп, кој рече дека САД ќе воведат царина од 35 отсто за увоз следниот месец и планира да воведе општи царини од 15 проценти или 20 посто за повеќето други трговски партнери.
Во своето писмо до Карни, Трамп навести дека ако Канада соработува со САД во спречувањето на увозот на фентанил во земјата, Вашингтон може да размисли за прилагодување на царините.
Канадскиот премиер се осврна на ова прашање: „Канада постигна витален напредок во ставањето крај на неволјата од фентанил во Северна Америка. Ние сме посветени на продолжување на соработката со САД за да спасиме животи и да ги заштитиме заедниците во двете наши земји“, додаде тој во својата објава.
Премиерот минатиот месец изјави дека тој и Трамп се согласиле да склучат нов економски и безбедносен договор во рок од 30 дена.
Карни, кој ја предводеше својата Либерална партија до изборна победа претходно оваа година со ветување дека ќе се справи со трговските предизвици со САД, имаше за цел да преговара за трговски договор со нивниот клучен трговски партнер до 21 јули.
