Сирискиот претседател Ахмед ал-Шара денеска го обвини Израел дека се обидува да ја вовлече Сирија во војна и изјави дека неговата земја нема да ја прифати провокацијата.
– Ние, народот на Сирија, многу добро знаеме кој се обидува да нè вовлече во војна и кој работи на тоа да нè подели, рече ал-Шара во утринскиот говор емитуван на националната телевизија.
– Нема да им дадеме можност да го вовлечат нашиот народ во војна која служи само за поделба на нашата татковина и за сеење уништување, додаде тој.
Ал-Шара го обвини Израел дека ја искористува нестабилноста по промената на режимот, обвинувајќи го за таргетирање на цивилна инфраструктура и обид да ги спречи напорите за обнова.
– Самата моќ не гарантира победа, а разгорувањето војна не е исто што и контролирање на нејзиниот исход. Посилни сме од секој обид да нè растргнат, рече тој.
Осврнувајќи се на внатрешните немири во јужната провинција Сувајда, ал-Шара рече дека владата интервенирала за да стави крај на вооружените судири меѓу локалните групи.
Судирите меѓу сунитските Бедуини и цивилите Друзи ескалираа во последните денови, со центар во градот Сувајда, каде што мнозинство се Друзи, при што сириските владини трупи беа распоредени во областа. Сириската опсерваторија за човекови права денеска соопшти дека бројот на загинати во насилството се искачил на 360 жртви.
Ал-Шара ги обвини „одметнатите фракции“ за отфрлање на дијалогот и поттикнување нереди, а Израел го обвини дека ги искористува немирите преку напади врз цивилната инфраструктура за да ги спречи мировните напори.
Тој, исто така, го реафирмираше местото на заедницата на Друзите во сириското општество, нагласувајќи ја посветеноста на државата за заштита на нивните права и слободи, и предупреди против обидите да се вовлече во странски агенди.
