Синоќа пред Државниот универзитет во Нови Пазар беше одржано седумнаесетминутно молчење, по што насобраните беа поканети да се упатат кон зградата на ПУ во Нови Пазар во знак на поддршка на уапсените, пишуваат регионалните медиуми.
Студенти и граѓани од блокада се собраа пред зградата на ПУ Нови Пазар, барајќи ослободување на уапсените. Тие рекоа дека ќе останат таму додека не бидат ослободени притворените.
Ситуацијата пред Државниот универзитет во Нови Пазар беше напната од вечерта во понеделник, кога маскирани насилници влегоа и насилно ги исфрлија студентите од зградата. Поради ова, студенти, граѓани и голем број полицајци се наоѓаат пред зградата на Универзитетот од раните утрински часови, вклучувајќи го и началникот на полициската управа, Нермин Љајиќ, кој беше удрен со шише во главата од насобраната толпа, поради што доби посекотина во пределот на слепоочницата.
Ветерани и студенти од Нови Сад, исто така пристигнаа во Нови Пазар синоќа. Студенти и граѓани на Нови Пазар ги пречекаа пред Државниот универзитет.
Претседателот на Србија, Александар Вучиќ, изјави дека четири лица се уапсени поради конфликтот меѓу граѓаните и полицијата во Нови Пазар.
„Сакам да кажам дека во Нови Пазар започнаа апсењата, четири лица се штотуку уапсени. Четворица од оние кои употребија насилство врз српската полиција и врз своите сограѓани, а апсењата ќе продолжат“, рече Вучиќ, кој преку телефон се приклучи на прорежимската телевизиска програма „Информер“.
Д. Т. / Цивил Медиа
