Целта на разговорите утре во Вашингтон меѓу американскиот претседател Доналд Трамп и украинскиот лидер Володимир Зеленски е да се претстави обединет фронт на Украина и нејзините европски сојузници, изјави попладнево францускиот претседател Емануел Макрон.
-Ако денеска покажеме слабост пред Русија, ги поставуваме темелите за идните конфликти, рече тој по видеоконференцијата на „Коалицијата на посветените“.
Францускиот претседател рече дека на состанокот на „Коалицијата на посветените“ европските сојузници на Киев се залагале за силен и траен мир во Украина и дека треба да се почитува територијалниот интегритет на Украина.
-Не може да има територијални дискусии за Украина без Украинците и исто така, не може да има дискусија за безбедноста на Европејците без нив, додаде Макрон, барајќи тие да бидат поканети на следните самити за Украина.
„Утре одиме во Вашингтон не само да го придружуваме украинскиот претседател, туку одиме таму да ги браниме интересите на Европејците“, нагласи тој.
Макрон рече дека рускиот претседател Владимир Путин не сака мир, туку капитулација на Украина.
-Дали мислам дека претседателот Путин сака мир? Ако мене ме прашувате, не. Тој сака капитулација на Украина; тоа е она што го предложи, рече шефот на француската држава.
По денешниот виртуелен состанок на „Коалицијата на посветените“, имаше повеќе изјави од европските лидери кои учествуваа во разговорите насочени кон заштита на мировниот договор за Украина.
Претседателот на Европскиот совет, Антонио Коста, на европските лидери им порача во случај да нема прекин на огнот во Украина, Европската Унија и САД мора да го зголемат притисокот врз Русија.
„Мора да се почитува сувереното право на Украина да ги утврди условите за мир“, рече Коста на платформата X.
Финскиот претседател Александар Стуб рече дека „постои силен консензус меѓу земјите од коалицијата за потребата да се продолжи со поддршката на Украина“.
Чешкиот премиер Петр Фиала рече дека коалицијата се согласила дека непосреден приоритет мора да биде запирање на убивањето.
Полскиот министер за надворешни работи, Радослав Сикорски рече дека „за време на разговорот, нагласив дека, за да се постигне мир, притисокот мора да биде насочен кон агресорот, а не кон жртвата, рече Сикорски.
Виртуелната средба ја предводеа британскиот премиер Кир Стармер, францускиот претседател Емануел Макрон и германскиот канцелар Фридрих Мерц.
Украинскиот претседател Володимир Зеленски учествуваше во видео повикот од Брисел, каде што го помина попладнето во друштво на претседателката на Европската комисија, Урсула фон дер Лајен.
Средбата се одржа пред утрешното патување на повеќе европски лидери во Вашингтон, каде што ќе му се придружат на Зеленски на состанокот со американскиот претседател Доналд Трамп.
Поврзано:
Зеленски и повеќе европски лидери утре на средба со Трамп во Вашингтон
