Американскиот специјален претставник Том Барак денеска изјави дека либанската Влада го направила „првиот чекор“ кон разоружување на проиранската група Хезболах и сега останува Израел да го направи својот дел за спроведување на договорот за прекин на огнот со кој заврши војната, јавија фарнцуските медиуми.
Ова е првата посета на Барак на Либан откако, под притисок на САД и соочена со ризикот од зголемени израелски напади во Либан, либанската Влада на почетокот на август ја задолжи армијата да изготви план за разоружување на Хезболах до крајот на годината.
Одлуката е дел од спроведувањето на договорот за прекин на огнот, постигнат на 27 ноември со посредство на САД, со кој заврши последниот едногодишен конфликт меѓу проиранското движење и Израел, вклучувајќи два месеци отворена војна.
-Мислам дека либанската Влада го направи првиот чекор. Она што ни треба сега е Израел да преземе соодветни чекори, рече американскиот претставник по средбата со либанскиот претседател Џозеф Аун.
Договорот за прекин на огнот бара Хезболах да се повлече од областите јужно од реката Литани и да ја повлече својата воена инфраструктура во замена за распоредување на либанската армија и мировните сили на ОН. Исто така, се бара Израел да се повлече од јужен Либан.
Меѓутоа, Израел продолжува да чува свои трупи на пет позиции на границата што ги смета за стратешки и редовно спроведува воздушни напади над територијата на својот сосед.
Запрашан за повлекувањето на израелските сили од Либан и прекинот на кршењето на договорот, Барак рече дека ова е „следниот чекор“.
-Во наредните недели ќе видите напредок на сите фронтови, уверува американскиот дипломат. „Ова значи подобар живот за луѓето од регионот“, додаде Барак.
Шиитското движење, единствената либанска вооружена фракција на која ѝ е дозволено да го задржи своето оружје по либанската граѓанска војна од 1975 до 1990 година, ја отфрли парламентарната одлука за разоружување. Лидерот на Хезболах, Наим Касем, во петокот ја обвини владата дека со овој потег ја „отстапува“ земјата на Израел.
