Тајландскиот суд ја отстрани суспендираната премиерка Паетонгтарн Шинаватра од функцијата во петокот, пресудувајќи дека нејзиниот контроверзен телефонски разговор со поранешниот лидер на Камбоџа ги прекршил етичките правила, во потег што го турка кралството во нови политички превирања.
Какошто пренесува Си-ен-ен, Петонгтарн, членка на моќната династија на политичкото семејство Шинаватра, стана најмладата премиерка во земјата во август 2024 година и отслужи само една година на функцијата.
Во протечениот повик, кој се одржал на 15 јуни, кога ескалираа граничните тензии со Камбоџа, Паетонгтарн можеше да се чуе како го нарекува поранешниот камбоџански премиер Хун Сен „чичко“ и се чинеше дека ги критикува постапките на сопствената армија во граничните судири што доведоа до смртта на еден камбоџански војник.
Петонгтарн, исто така, додаде дека ако Хун Сен „сака нешто, само кажи ми и јас ќе се погрижам за тоа“ – спорни забелешки што станаа центар на случајот против неа.
Нејзините коментари во протеченото аудио, кое беше потврдено како автентично од двете страни, го погодија нервот во Тајланд. Националистичкиот жар веќе беше силен околу граничниот спор, а противниците ја обвинија дека ги компромитира националните интереси на земјата.
Петонгтарн им се извини на тајландскиот народ „кој можеби се чувствува непријатно или вознемирено поради ова прашање“ и рече дека нејзините забелешки се преговарачка техника што се користи за смирување на тензиите.
На 1 јули, судот ја суспендираше Паетонгтарн од премиерските должности, иако таа остана во кабинетот како министерка за култура по реконструкцијата.
Одлуката на Уставниот суд во петокот претставува уште еден бран во турбулентните брзаци на тајландската политика, во која оние што се залагаат за промени честопати се судираат со естаблишментот – мала, но моќна клика на воени, ројалистички и бизнис елити.
Д. Мишев / Цивил Медиа
