Јапонските власти објавија видео, создадено со помош на вештачка интелигенција, кое прикажува најлошо можно сценарио во случај на ерупција на вулканот Фуџи. Снимката е наменета за граѓаните и експертите со цел да се зголеми свесноста за последиците и да се подобри подготвеноста на Токио за природна катастрофа од огромни размери.
Видеото детално покажува како пепелта, чадот и лавата од Фуџи би се ширеле кон Токио и околината, прикажувајќи нарушувања во сообраќајот, прекини во снабдувањето со струја и потешкотии во функционирањето на јавните служби, пренесе Би-Би-Си.
„Сакавме граѓаните да добијат што пореалистична претстава за можната опасност,“ соопштија властите на Токио.
„Вештачката интелигенција овозможува, врз основа на сеизмолошки и метеоролошки податоци, да се реконструира сценарио кое не е само научна проекција, туку и визуелно искуство што може да помогне во планирањето и обуката“, посочуваат градските власти.
Последната ерупција на Фуџи се случила во 1707 година, кога вулканскиот пепел го прекрил тогашниот главен град Едо, денешен Токио. Научниците предупредуваат дека вулканот сè уште е активен и дека нема гаранција дека сличен настан нема да се повтори.
Јапонската влада веќе со години развива планови за евакуација и безбедносни протоколи, но видеото со АИ претставува нов пристап – комбинација од научни податоци и модерна технологија.
