Грчкиот премиер Кирјакос Мицотакис и турскиот претседател Реџеп Таип Ердоган се очекува да се сретнат на маргините на Генералното собрание на ОН во Њујорк на крајот од месецов, најави министерот за надворешни работи на Грција Јоргос Герапетритис во интервјуто за грчката телевизија Action 24“, јави дописничката на МИА од Атина.
Шефот на грчката дипломатија посочи дека сè уште не е одреден конкретниот датум, но ќе биде во периодот меѓу 22 и 26 септември и нагласи дека нема да биде само протоколарна средба, бидејќи ниту една од средбите на двајцата лидери во минатото не беше само протоколарна.
Дополнително изрази желба односите меѓу двете земји да можат да стигнат до ниво на целосна нормализација и „да не биде главна вест дека двајца лидери на соседни земји се сретнуваат и разговараат“.
– Навистина ќе се одржи оваа средба, ќе биде суштинска средба и се надеваме дека ќе се ублажат разликите што постојат, посочи Герапетритис.
Говорејќи за грчко-турските односи истакна дека во изминатите две години работеле на воспоставување на функционални односи базирани на доверба и покрај различните позиции што ги имаат двете земји.
За Украина потенцираше дека Грција нема воено да учествува во безбедносните гаранции за Украина, туку ќе учествува во обновата и хуманитарните акции.
Во однос на ситуацијата во Газа рече дека „во моментов се случува хуманитарна катастрофа“.
– Треба да се исцрпат сите можности за веднаш да се запрат непријателствата. Да се обнови протокот на хуманитарна помош, секако заложниците безусловно да се вратат, а во рамките на политичкото решение, да се воспостави Палестинска држава, рече Герапетритис.
За барањата на грчката опозиција за признавање на Палестинската држава, објасни дека е јасно дека Грција ќе ја признае и прашањето не е дали ќе ја признае, туку кога ќе се случи тоа.
