Во Стразбур денеска почнува овонеделната сесија на Европскиот парламент на чиј дневниот ред, меѓу другото, се и годишното обраќање на претседателката на Европската комисија, Урсула фон дер Лајен пред европратениците, познато како за „Состојбата на Европската Унија“, трговскиот договор меѓу ЕУ и САД, состојбите во Украина и во Газа и случувањата во Србија.
Седницата започнува доцна попладнево со дебати за инвестициите и реформите насочени кон зајакнување на европска конкурентност, за создавањето на Унија на пазари на капитал, за дизајнот на возилата, за јавните набавки и за обнова на мандатот на Форумот за управување со интернетот.
Утре заседанието ќе продолжи со дебата на европратениците со високата претставничка на ЕУ за надворешни работи и безбедносна политика Каја Калас посветена на активностите на ЕУ за постигнување безбедносни гаранции и праведен мир за Украина. Во продолжени пред европратениците ќе се најде и Извештајот на ЕП за Украина за 2023 и 2024 година, по што ќе следи и гласање по него. Целта на Извештајот е да се охрабри украинската Влада да го одржи реформскиот моментум за патот на земјата кон членство во ЕУ.
По Украина, Калас и европратениците ќе дебатираат и за состојбата во Појасот Газа. Во рамки на дебатата насловена „Газа на пресвртна точка“ се очекува да стане збор за одговорот на ЕУ за справување со гладот во Појасот, да се реафирмира потребата од ослободување на заложниците и да се поттикнат напорите за конечен мировен договор по „моделот на две држави“. Од дебатата треба да произлезе Резолуција, за која европратениците ќе гласаат в четврток.
Претпладневниот дел од утрешното продолжение на заседанието ќе заврши со обраќање на молдавската претседателка Маја Санду пред европратениците. Обраќањето ќе се одржи пред дебатата, предвидена за утре вечер, за отпорноста на Молдавија кон руските хибридни закани и мешање. И од оваа дебата ќе произлезе Резолуција за која европратениците ќе се изјаснат в среда.
За време на утрешниот термин за гласање членовите на ЕП, покрај за Извештајот за Украина, меѓу другото, ќе треба да се изјаснат за Извештајот по Рамковна директива за отпад од текстил и од храна, за Договорот за соработка меѓу Европол и Федералната полиција на Бразил, за Договорот за засилено партнерство и соработка меѓу ЕУ и Киргистан и за избор на членови на Судот на ревизори.
Сесијата утре попладне ќе продолжи со дебата за потребата од зајакнување на помошта на ЕУ за обнова на шумите уништени во катастрофални шумски пожари во Јужна Европа и за подобрување на подготвеноста на Унијата за справување со огнени стихии.
По ова ќе следат дискусии за состојбите со Европскиот социјален фонд, за улогата на Кохезивната политика и за поедноставување на пристапот до средства од кохезивните фондови и за ограничување на емисиите на јаглерод.
Во вечерниот термин утре, покрај за Молдавија, европратениците ќе расправаат за „бранот насилство и континуирана употреба на сила против демонстрантите во Србија“ и за состојбата во Колумбија по последниот бран терористички напади.
В среда сесијата ќе започне со традиционалното обраќање на Фон дер Лајен за „Состојбата во Европската комисија“, во која се очекува таа да се осврне за резултатите од работата на Комисијата од стартот на мандатот во декември минатата година и за нејзините идни активности.
Најавувајќи го своето обраќање, Фон дер Лајен во објава на Икс посочи дека Еврокомисијата годинава работела напорно за ја да ја зајакнеме одбранбена позиција на ЕУ, да ги поттикне нејзиниот раст и иновациите и да создаде нови работни места.
– Од ветување, до напредок, Европа испорачува за своите граѓани. Придружете ми се на 10 септември за мојот говор за Состојбата на Унијата, наведе Фон дер Лајен во објавата.
По обраќањето, ќе следи дебата европратениците за оценка за работата и стратегијата на Комисијата и за она на што, според нив, таа треба првенствено да се посвети.
В среда попладне заседанието ќе продолжи со тематска дебата иницирана од пратеничката група „Патриоти за Европа“ (ПФЕ) насловена „По 10 години, време е да се стави крај на масовната миграција – да се заштитат нашите жени и деца“.
По ова ќе следи дебата на европратениците со претставници на Европската комисија и на Данското претседателство со ЕУ за трговскиот договор меѓу Европската Унија и САД и за можностите за понатамошни договори со други трговски партнери, по што Советот на ЕУ ќе ја претстави својата позиција за Предложениот буџет на блокот за 2026 година.
Во продолжение европратениците ќе дебатираат за законските предлози за заштита на патниците и нивните права за поврат на средства во случаи на прекин на патувањето или банкрот на туристичките оператори, за потребата од заштита на демократија и изборните процеси во ЕУ од странско мешање и хибридни закани, за безбедносните закани по воздушниот и поморскиот транспорт преку прекини на Глобалниот навигациски сателитски систем, за оданочување на големите дигитални платформи, за владеење на правото и управување со средствата од фондовите на ЕУ во Словачка и за состојбите со човековите права во „окупираните области на Кипар, во Руанда и во Того.
На последниот ден од овонеделната сесија, в четврток, европратениците ќе расправаат за „новата визија за европските универзитетски сојузи“, за обезбедување соодветни политики за домување и здравство во услови со рекордни температури и топлотни бранови во ЕУ, за поедноставување на правилата за европскиот внатрешен пазар и за Европската стратегија за справување со Алцхајмеровата болест и другите видови деменција.
