Федералните работници кои се на принудно отсуство во текот на прекинот на работата на американската Влада можеби нема автоматски да добијат надомест, се наведува во нацрт-меморандумот на Белата куќа, во кој увид имаше Аксиос.
Според документот, Белата куќа верува дека законот познат како Закон за фер третман на државните службеници (GEFTA) од 2019 година не гарантира автоматска исплата на заостанатите плати на вработените кои се на отпуст, освен ако Конгресот конкретно не одобри средства откако ќе заврши прекинот на работата.
Овој став би можел дополнително да го зголеми притисокот од американскиот претседател Доналд Трамп врз демократите во Сенатот да поддржат таканаречена „чиста“ резолуција за финансирање на владата, без услови поврзани со субвенциите за здравствена заштита.
Законот GEFTA, кој Трамп го потпиша за време на рекордниот прекин на работата во 2019 година, првично беше толкуван така што на работниците на принудено отсуство им гарантираше надомест по завршувањето на идните прекини на работата.
Меѓутоа, во новиот меморандум од Канцеларијата за управување и буџет (OMB) се наведува дека законот бил погрешно протолкуван, бидејќи неговата верзија била изменета девет дена подоцна за да се додаде формулација дека работниците ќе бидат платени „под услов да се донесе закон за апропријации со кој ќе се стави крај на застојот“.
Според Белата куќа, ова значи дека Конгресот мора конкретно да одобри средства за исплата на заостанатите плати.
Оваа анализа на OMB е во спротивност со ставовите на Советот на економски советници и Канцеларијата за управување со персонал, кои претходно изјавија дека работниците на отпуст треба автоматски да добиваат надомест.
