Израел и натаму им забранува на странските новинари да имаат слободен пристап до опустошениот Појас Газа, дури и по договорот за прекин на огнот во конфликтот во Газа, јави ДПА.
Иако имаше расправа пред највисокиот суд во Ерусалим во врска со барањето од Здружението на странски новинари (FPA) да им се дозволи на новинарите да патуваат до затворената крајбрежна енклава, судот ѝ даде на израелската Влада дополнителни 30 дена за да презентира јасна позиција, потсетува германската агенција.
FPA денеска реагираше со разочарување и го обвини Израел дека користи тактики на одложување.
Пристапот до Појасот Газа е целосно контролиран од Израел. Од почетокот на конфликтот во Газа пред повеќе од две години, странските новинари можеа да го посетуваат Појасот Газа само повремено со израелската армија, и им беа прикажани само многу специфични области.
