Валентин Нешовски официјално ја заокружи својата научно-фантастична трилогија со новиот роман „Кафеана на крајот и на почетокот од универзумот“, кој штотуку излезе од печат во издание на „Антолог“. Првите две книги од серијата се „Една книга“ и „Последната мисла во универзумот“, а промоцијата на третиот дел ќе се одржи кон средината на декември.
„Излезе од печат мојата завршна книга од сај-фај трилогијата. Се вика ‘Кафеана на крајот и на почетокот од универзумот’ во издание на Антолог“, напиша Нешовски во својата објава, додавајќи дека читателите може да очекуваат промоција во декември.
На последната страница од романот авторот го остава следниот концепциски запис, кој ја открива филозофската насока на делото:
„Патување низ една вселена каде границите меѓу реалност и симулација се топат во чад од кафеанска ламба. Дон, Роб, Хал, Р2 и чудесни битија како Природата, Спектар и Моно се вплеткуваат во разговори што се нишаат меѓу смеење и апокалипса, меѓу научни формули и егзистенцијални прашања.“
Нешовски објаснува дека книгата „ја меша иронијата на Даглас Адамс, метафизиката на Ками и визијата на Лем“, но ја сместува во универзална кафеана – „архетипско место каде секоја цивилизација би можела да ја започне или заврши својата приказна“.
Во текстот се поставуваат теми за симулации, копии на реалноста и „симулакруми поавтентични од неа“, додека времето и законите на космосот добиваат необични, дури шеговити функции. Книгата го води читателот кон големото прашање: дали смислата на човештвото е „слободата што создава светови – или љубовта што ги чува“.
„Ова не е обичен роман, туку филозофска научна фантастика за оние што сакаат да го постават најстарото прашање на нов начин“, стои меѓу заклучните редови.
