Актуелниот претседател на САД Доналд Трамп синоќа иницираше постапка за означување на одредени делови на организацијата „Муслиманско братство“ како странски терористички организации и како специјално назначени глобални терористи, што би довело до воведување санкции против едно од најстарите и највлијателни исламистички движења во арапскиот свет.
Според соопштението на Белата куќа, Трамп потпишал указ со кој му наложува на државниот секретар Марко Рубио и на министерот за финансии Скот Бесонт да подготват извештај за тоа дали да бидат прогласени за терористички организации одделни делови на „Муслиманско братство“, меѓу кои и оние во Либан, Египет и Јордан. По доставувањето на извештајот, министрите треба да преземат активности во рок од 45 дена.
Администрацијата на Трамп ги обвинува фракциите на „Муслиманско братство“ во споменатите земји дека поддржуваат или охрабруваат напади врз Израел и партнери на САД, или дека даваат материјална поддршка на палестинската вооружена група „Хамас“.
„Претседателот Трамп се спротивставува на транснационалната мрежа на ‘Муслиманско братство’, која го храни тероризмот и кампањите за дестабилизација насочени против интересите и сојузниците на САД на Блискиот Исток“, се вели во соопштението.
„Муслиманското братство“ е основано во Египет во 1920-тите како исламско политичко движење за спротивставување на ширењето на секуларни и националистички идеи и брзо се проширило низ муслиманскиот свет, често делувајќи во сенка.
