За уривање на облакодерот на „Вјесник“ во Загреб, кое најверојатно ќе се изврши со минирање, ќе бидат потребни стотици килограми експлозив, изјави професорот од Рударско-геолошко-нафтениот факултет, Марио Добриловиќ, пренесе Хина.
Иако точниот датум сè уште не е познат, професорот Добриловиќ, кој беше на терен, потврди дека уривањето ќе се изврши за неколку недели, откако ќе се изработи проектот.
Добриловиќ истакна дека минирањето е најдоброто решение, иако надлежните институции сè уште немаат донесено конечна одлука. Во однос на минирањето, како што објасни, станува збор за неколку стотици килограми експлозив, а не тони, а самото уривање би траело неколку десетици секунди, најмногу до половина минута.
Тој посочи дека ќе мора да се преземат апсолутно сите мерки за да се избегнат закани. Безбедносната зона ќе ја вклучува постоечката зона што се користи за регулирање на сообраќајот.
– МВР ќе даде јасни упатства за станарите во околните згради. Една варијанта е луѓето што живеат во најблиските згради да ги напуштат своите станови на половина час, а другата е да ги спуштат ролетните и да ги отворат прозорците за да се минимизира влијанието на бучавата, воздушниот удар и прашината, појасни Добриловиќ.
Минирањето се изведува со дупчење дупки за полнење со експлозив кои се полнат со мали полнења и се распоредуваат на оние носечки елементи кои треба да се минираат. Се минира бетонот, а не целата зграда.
Професорот сликовито додаде дека по правилното поставување на мини, објектот се руши таму каде што се сака, а потоа „нашиот господин Њутн го завршува тоа, односно мајката земја гравитацијата“.
Дел од анексите во комплексот „Вјесник“ ќе бидат оштетени, додека делови, како што се Прес-центарот и печатницата, ќе останат зачувани. Ќе настрадаат објектите на западната страна на кои ќе се урне облакодерот – што се, како што рече Добриловиќ, „колатерални жртви“.
